Central Jail atangin mi 2 tlanchhuak; Kum 10 chhungin tang tlanchhuak an tam

Inrinni zing khan Central Jail-a tang mi pahnih chu tlanchhuakin man tuma zawn mek an ni a, kum 10 kalta chhungin Mizoram-ah Jail tang tlanchhuak mi 50 aia tam an awm nia thudawn a ni.

Inrinni zing dar 3:45 vel khan Aizawl Tanhril-a Central Jail atangin Jail-a tang mek hnamdang pahnih chu an tlanchhuak a, heng tang tlanchhuakte hi Jiban Uddin (33), Karimganj leh Kamal Hossein (27), Tripura lam mite an niin an pahnih hian ND&PS Act hmanga man ve ve an ni a, an thubuai hi ngaihtuah lai mek an ni a. An tanna Ward Ventilation tichhiain GI pipe hmangin Jail hungna bang an lawnliam nia thudawn a ni a, heng mite hi man tuma zawn mek niin he thu buatsaih lai thleng hi chuan man an la ni lo thung.

Hetihlai hian tunhnai kum 10 kalta chhungin Mizoram-a Jail hrang hrang atangin tang tlanchhuak mi 54 zet an awm niin chhinchhiah a ni a, heng Jail tang tlanchhuak zingah hian man loh mi 23 zet an la awm a ni. Aizawl-a chanchinbu pakhat in RTI hmanga a zawhna Prison Department ASPIO-in a chhanna leh tunhnaia Jail tang tlanchhuak chhinchiahna khaikhawm atanga a lan danin kum 2013 atanga kumin 2023 chhungin Central Jail Aizawl atangin tang tlanchhuak mi 13 an awm a, an zinga mi pathum man an ni tawh a, mi 11 man loh an la awm a, la man loh zinga mi palite chu POCSO thubuaia tang an ni a, mi dangte hi ND&PS Act hnuaia thubuai nei te an ni thung a ni.

Kum 2022 chung khan District Jail, Aizawl atangin tlanchhuak mi pali awm bawkin an tlanchhuah atanga darkar 24 ral hmain man leh vek an ni a. District Jail, Lunglei atanga tlanchhuak mi 14 awmin an zinga mi parukte chu man loh an la ni a, mi dang 8-te chu man tawh an ni a. April 19, 2023 zinga tlanchhuak mi panga te zinga pathum chu man tawh niin la man loh pahnih, Vanneihthanga, Leisen, Myanmar (March 1, 2023 atanga tang) leh Haudeihchin, Tlangnuam, Champhai district (November 10, 2023 atanga tang) te man an la ni lo.

Kum 10 kalta chhung khan District Jail, Siaha atanga tang tlanchhuak mi 16 an awm bawk a, chung zinga mi 15-te chu man leh tawh an ni a, an zinga pakhat POCSO thubuai vanga tang leh November 2, 2021-a tlanchhuak, Vanlalliana chu man loh a la ni a. District Jail, Champhai atanga June 15, 2019-a tlanchhuak pahnih, Vansuiemi leh Ngunchuaii, ND&PS thubuaia tangte chu man an la ni lo bawk. District Jail, Kolasib atangin kum 2017 leh 2018 khan tang tlanchhuak mi pahnih awm bawkin, man ve ve tawh an ni.

Serchhip District Jail-a tang David Lalremruata (30), Zokhawthar; Lalzuimawia (24), Zokhawthar leh Lalnunhlima (32), New Serchhip Luiralmawi nia insawi te chu kumin March 17 khan tlanchhuakin heng mi te pawh hi man an la ni leh ta rih lo nia hriat an ni a, heng mite hi thenawm ram ah an lut tawh nia hriat a ni bawk.

Comments

Popular News (Last 30 Days)

LPG man bithliah thar