Induhsakna hna in environment a tihchhiat pawi ti

ZPM Thalaite chuan MNF sawrkar in leiba hmanga chhungkaw induhsakna a kalpui leh chutiang hmalakna in kan environment a tichhia chu pawi an tih thu an sawi.

ZPM Thalaite hian Inrinni kalta khan Khamrang to Dilsei to Selesih leh Sirvakawn to Selesih by-pass road laih mek chu an tlawh thu sawiin, helai kawng laihna atan hian Mizoram sawrkarin cheng nuai 5924.86 chu NABARD hnuaia Rural Infrastructure Development Fund atangin a pung awma pukin, cheng nuai 658.32 chu State sawrkarin a thawh ve tura ruahman a ni tih an sawi a. Helai kawng laitu tur zawn hna hi Restricted Tender hmanga chhuah niin bialtu MLA, Chief Minister leh PWD Minister ni bawk Zoramthanga vua leh vâng mi 6 hnenah duhsak taka pek bîk a nih thu an sawi a ni.t

ZPM Thalaite chuan hetianga chhungkaw induhsakna hleihluak taka Chief Minister-in a pek kawng laih hna thawktu Contractor-te hian an leivûngte chu mumal taka a paihna hmun siama paih lovin, kawngthlang lamah nawr thlain, kawrte hnawhin thing leh mau leh nungcha tam tak an tichereu niin an sawi a. He kawng laihah hian a thawktute hian Environmental Clearance engmah an neih loh thu leh Environmental Assessment pawh tih a nih loh thu an sawi bawk a. He kawng hi March 2024-a zawh hman tura ruahman nia sawiin, kawng laih hna km 28 turah km 10 erh awrh chauh laih niin RCC-a chhun leh vek tur niin an sawi bawk.