Serchhip-ah District Bawrhsap hovin Green Mizoram Day hman a ni

Mizoram ti hring tura thingphun beihpui thlakna ni, Green Mizoram Day chu nimin khan Mizoram hmun dangte rualin Serchhip-ah pawh District Bawrhsap hova hman a ni a, he ni pual hian Khawtetlang-a DC Playground sir-ah thingtiak thahnem tak phun a ni bawk.

Green Mizoram Day pual hian Serchhip DC Conference Hall-ah inkhawm neih hmasak niin he hunah hian District Bawrhsap Nazuk Kumar IAS chuan kan ram mawi tak vawnghim reng tur leh a chhunga cheng mipuite mamawh tinreng a phuhruk zel theih nan ramngaw te, nungchate, kan lui leh tuihna te kan humhalh a tul thu a sawi a. Chutiang lama kan thanharh theihna tur chuan Green Mizoram Day chu a tangkai thu leh hemi kawnga kan rilru ti thartu atan kan hman a pawimawh thu a sawi a. Kan ramngaw te kan humhim theih nan kan Farming system te pawh kan thlak chhoh a tul thu Bawrhsap chuan sawiin, khuarei daih tur hmasawnna hmalakna (sustainable development) lamah pawh kan thangharh chho ve zel bawk chu lawmawm a tih thu a sawi a, “Vawiin-a loh theih lohva thing leh mau kan tihchhiatte pawh hi a rulhna tawk thing leh mau kan phun zela, kan dinhmun tichhe zel lo zawnga kan kal thiam a pawimawh. Keimahni ngei hi he ram venghimtu leh kan tu leh fa lo awm zel turte tana chenna tlaka buatsaihtu tur kan nih hi i hrereng ang u,” tiin kalkhawmte a sawm a ni.

Serchhip-a Green Mizoram Day puala hun hman hi Thenzawl DFO Lalbiakchama Chawngthu chuan kaihruaiin Govt. Serchhip College-a Asst. Professor, Dr. Lalremsiami Hrahsel chuan ‘Ramngaw (environment) humhalh tura kan mawhphurhna’ tih thupui hmangin thu a sawi a. Kumin a kangmei venna kawnga thawk tha State Level in a thlanchhuah te hnenah lawmman semin pakhatna Khawbel VC chuan Citation leh Rs. 50,000/- dawngin pahnihna East Lungdar VC in Citation leh Rs. 30,000/- an dawng a, pathumna Buangpui VC chuan Citation leh Rs. 20,000/- an dawng bawk a. Hei bakah hian District Level Committee in kangmei venna kawnga thawk tha khaw pathum an thlan Neihloh, Keitum leh Leng khua te hnenah Citation leh Rs. 5000/- theuh hlan an ni bawk.

Kumin a Green Mizoram Day-ah hian thupui atan ‘Thing phun ila, enkawl zui ang u’ tih chu hman niin he huna kalkhawmte hian ramngaw humhalh turin Serchhip District Honorary Wildlife Warden RL. Chhuanawma kaih-hruaina hnuaiah thutiam an chham rual a. DC Conference Hall-a hun hman zawh hnu hian Khawtetlang-a DC Playground sir-ah thingphun beihpui thlak chhunzawm nghal niin Department hrang hrang ten anmahni  hmunhma ah thingtiak an phun bawk a ni.