Hualtu (Serchip District) atanga Aizawl chawmna tur tuikhuahna hmun Dy. Chief Minister in a tlawh

Aizawl khawpui tui hasatna sutkian thenna (supplement) tura Hualtu khaw dai, Dilzawl hmun-a tui khuahna hmun (earthen dam) chu nimin khan PHE Department changtu Deputy Chief Minister Tawnluia chuan a hmunah a tlawh.
He tuilakna tur, Alternate Gravity Water Supply Scheme of Aizawl (AGWSSA) hi Aizawl chhimlam chuanhnuai Veng thenkhat - Mualpui leh Mission Vengthlang bakah Muallungthu tlangdung khaw hrang hrangte bakah Zoram Medical College (ZMC) huam telin mihring nuai 2 vel Fur ruahtui chhawr tangkai theih hun (thla 5-6) chhung vel chawm thei tura duan a ni a. Ministry of DoNER-in NESIDS hnuaia thawh tura a ruahman niin cheng nuai 11730.35 senna tur a ni a, a vaiin sawrkar laipui tum tur a ni. AGWSSA sak hna thawk tur hian Tender kaltlangin M/S Kram Infracon Pvt. Ltd. and Vikash & Associates (JV), Noida te thlan an ni a. September ni 12, 2019 khan thawh tan niin March, 2024 a zawh hman beisei a ni.

AGWSSA atana tui khuah mek hian Hualtu khaw dai, Dilzawl hmuna Tuikum leh Lunglei lui hnar bakah van ruahtui khawl (rain water harvesting) a ring dawn a, tuikhuah (earthen dam) hi metre 14 a sang niin a chhip sei zawng hi metre 75 a ni a, metre 3 in a zau bawk a, a mawng hi metre 82 a zau niin, tuikhuah in a chim chin hi hectare 4.1 a ni a, tui litre maktaduai 74 dawng tur a ni.

Tuikhuah thlen hma metre 900 velah hian tuikhuah atanga tui lak tih thianghlimna hmunpui Water Treatment Plant (WTP) siam a ni a, WTP hi Rapid Sand Filtration Unit kaltlanga tui thlitfim tura ruahman niin ni khatah tui litre maktaduai 15 thlitfim theih tura ngaih a ni. WTP atang hian lei hipna (Gravity) hmangin tui hi lak a ni anga, pipe inches 18 hawlhtlang-a lian hmangin Hualtu-Khumtung-Muallungthu kaltlangin km 39-a thuiin Muallungthu tlang-a tuizem lian litre nuai 15 dawngah nitin tui litre maktaduai 12 chhunluh a ni ang a, Muallungthu tlang-a tuizem lian thlen hma Muallungthu kawng peng thuam atangin pipe inches 8-a lian hmangin Trinity Hospital, Silaimual thleng tui litre maktaduai 3 nitin lak phei a nih hnuah pipe inches 5-a lianin Mission Vengthlang tuizem lianah tui litre maktaduai 1 nitin dah a ni ang a, Mualpui tuizem lian-ah pipe inches 6-a lianin tui litre maktaduai 2 nitin dah luh a ni ang. Tui lak theih hun chhung hi Hualtu rama tuikhuah (earthen dam) in ruahtui a khawl theih chhung a ni ang.

Tun dinhmunah tui khuah (earthen dam) sak hna hi za zela 85 (85%) thawh zawh tawh a ni a, Water Treatment Plant sak hna pawh 95% zo tawhin, pipe phum hna hi 75 % leh tuizem lian sak hna 98% thawh zawh a ni tawh bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man