Mahni fanu pawngsualtu kum 12 tang turin hrem

Nimin khan Special Judge (POCSO Act) Aizawl District Court Vanlalenmawia chuan mahni fanu pawngsualtu-a puh chu thiamloh a chantir hnuah kum 12 chhung hrehawm taka tang tur leh Rs. 5000/- chawi turin a hrem.

Nimin-a Court in hremna a puan tak hmeichhhe naupang pa hian a fanu kum 14 mi chu August 5, 2013 khan ramhnuaia thing an phurhna ah pawngsualin hemi hnu hian he hmeichhia hian nau a pai zui nghe nghe a, September 2015 khan naute a hring tawh a ni. Hemi hnu hian a pa hian he hmeichhe naupang hi chetsualpui zuiin kum 2018 thleng khan a pawngsual a, Nov. 22, 2018 khan a nu chuan Police Station pakhat-ah FIR thehlutin thubuai siam sak a ni a, hun engemaw chen ngaihtuah a nih hnuah Special Judge (POCSO Act) Aizawl District Court Vanlalenmawia chuan May 29, 2023 khan a pa hi thiamloh a chantir tawh a ni.

Nimin khan Court chuan a pa hremna tur hi puangin kum 12 chhung hrehawm taka lung In tang tura a chungthu a rel bakah Rs. 5000/- chawi turin a hrem a, a pawisa chawi tur hi a pe lo a nih chuan ni 25 chhung a tan belh leh dawn bawk a. Tunah hian hmeichhe naupang pa hi Central Jail-ah dah mek niin he thubuai ah hian Bail-a chhuah phal a ni lo bawk. (Nimin-a Court in a hrem tak hmeichhe naupang pa hming hi tarlan a nih chuan kum tlinglo a fanu hi chhui theih a nih dawn avangin an hming leh khua hi tarlan a ni lo a ni.)