Health Minister in District 7-a hman tur MSACS Mobile ICTC a vailiam

Mizoram State AIDS Control Society (MSACS) hmalakna a hmun kilkhawr bera chengte tan pawha HIV/AIDS dinhmun hriat zung zung theihna tur ‘MSACS Mobile Integrated Counselling & Testing Centre’ (ICTC) chu Mizoram District 7-a hman turin nimin khan Health Minister Dr. R. Lalthangliana chuan Aizawl atangin a vailiam.

MSACS Mobile ICTC vailiamna puala inkhawm MINECO tualzawl-a neih ah Health Minister Dr. R. Lalthangliana chuan District 7 te tana Mobile ICTC thar vailiam a ni chu lawmawm a tih thu sawiin, Mizoram chu HIV/AIDS vei tamna leh Cancer hluarna State a nih avangin beihpui thlak a ngai tih a sawi a. Chutih rual chuan hmingthatna tam tak kan nei ve tih sawiin, ram mawina leh thatna te chu hnamdang lakah lanchhuah tirin a awm mek tih a sawi a. Mizoram chu rampum leh State chhung mipui nawlpui hriselna tehfung pawimawh tak, naupiang 1000 zela nausen kum khat hnuailam thi zat chhutna Infant Mortality Rate (IMR)-ah a titha ber State a nih thu a sawi bawk.

Health Minister chuan Mizoram run mektu HIV/AIDS leh Cancer dona ah tangho a beihpuithlak tak tak a nih chuan hneh theih a nih thu sawiin, Mobile ICTC chu National AIDS Control Organisation (NACO) in a phal angin District 7 tan lei niin Aizawl East, Aizawl West, Mamit, Kolasib, Champhai, Serchhip leh Lawngtlai District-ah te dah tur a nih thu a sawi a, Motor bakah hian Counsellor, Lab. Technician leh Driver te pek vek an nih thu a sawi a. Nimin-a vailiam takte bakah kum 2023-2024 chhunga lei atan District dang tan pawh Motor thar hi dil mek niin, a thuphung chuan NACO pawhin a pawm tawh tih a sawi a. Mobile ICTC chu District Hospital bakah PHC leh CHC-a ICTC pan thei lo tan a tangkai em em dawn tih sawiin, mi harsa zawkten Health Facilities an chhawr ve theihna hmanraw pawimawh tak a nih avangin a hlut thu leh tuna motor te chu MSACS-a Project Director leh BSD Division hotuten Global Fund atanga harsa taka an dil chhuah a nih thu a sawi bawk.

He huna tarlan a nih danin Mizoram-ah HIV/AIDS finfiah (confirm) theihna hmun 'Stand Alone ICTC' 41 awm tawhin, Aizawl District-ah hetiang hmun hi a tam tawh laiin District dangah chuan hmun 4/5 chauh ah a awm a; HIV/AIDS chungchangah mahni dinhmun hre turin thingtlang kilkhawr atangin District Hospital pan vang vang ngaihna hmun a awm thin avangin heng harsatna te hrethiamin NACO chuan Mobile ICTC hi District zawng zawng tan 2006-2008 khan MSACS kaltlangin lei a lo ni tawh a ni. 

Heng Motor-te hi a lo upat tak avang leh a lo chak tawh loh avanga NACO-a vawi tam tak a thlakna tur dil a nih hnuah FY 2022-23 ah Global Fund Grant hnuaiah Mobile ICTC sanction hmuh a ni a. Government Codal Formalities zawng zawng zawm chungin Procurement Pocess kalpui niin Mizoram tan bika Technical Specifications mila rawn chhangte zingah Mahindra Motors-te chu Supply Order pek an ni a, thingtlang kawng biboh leh kawng nal ngam, thawktute tan chuan nuam tur leh Multi Terrain Technology nei Bolero Neo chu Mobile ICTC Motor a tan hian tlangzarh a ni ta a ni.

Nimin-a MSACS Mobile ICTC vailiamna hunah hian MSACS State Project Director Dr. Lalthlengliani pawhin thu a sawi bakah MSACS Joint Director Dr. Shahnaz Zothanzami chuan Technical Report a pe a. Financial Year 2023-2024 chhung hian Siaha leh Lunglei District Mobile ICTC te thlakna tur Motor thar dilna NACO-ah thlen tawh niin a thu chuan pawm (approve) tawh a nmi a, Final approval dawn a nih hunah a taka bawkzui nghal a ni dawn bawk a ni.

MSACS chuan Mobile ICTC Service tan tirh atangin Standard Operating Procedure leh Guidelines fel fai tak duan sa a nei tawh a ni.