Accredited Journalist ni tura a thlan te hnenah ‘Press Accreditation Card’ semchhuah a ni

Mizorram State Press Accreditation Committee-in Accredited Journalist ni tura a thlan te hnenah nimin khan I&PR Minister Lalruatkima chuan ‘Press Accreditation Card’ a semchhuak.

‘Press Accreditation Card semna puala inkhawm Aizawl-a I&PR Auditorium-a neih ah hian I&PR Minister Dr. R. Lalthangliana chuan sawrkarin chanchinbu mite a dah pawimawh hle tih sawiin, Accredited Journalist ni tura State Press Accreditation Committee-in uluk taka a thlanchhuah ten Accreditation Card an dawng thei chu a lawmpui thu leh tangkai taka hmang tura a duhsak thu a sawi a. Press Accreditation Card hian Mizoram chhung leh pawn ah tangkaina tam tak a nei tih sawiin, chutih ruala mawhphurna a ken telte chu hre reng turin chanchinbumite a chah bakah Journalist-te chu an thuziak leh thu puanzarin ram inrelbawlna thlenga nghawng a neih theih avangin an pawimawhna hre thar tur leh an thuziak te uluk lehzuala endik thin turin a fuih bawk. I&PR Minister chuan Journalist-te tan sawrkarin theihtawp a chhuah thin a ni tih sawiin, Journalist Pension Scheme pawh tihpuitlin thuai a nih tur thu a tarlang a. Tun dinhmunah Journalist Welfare Fund atan cheng nuai 20 dah niin, Press Tour vawi 5 neih tawh niin Parliament-a training nei turin chanchinbumite chu Btch hnih lai tirh a nih tawh thu a sawi bawk.

Information Technology-in khawvel a run mek thu leh technology chhuak tharte umpha tur chuan mahni insiamrem a ngaih chang a awm fo tih pawh Minister chuan sawiin, hmanraw thar hmang thiam zel turin chanchinbumite pawh mahni intuaihriam thiam turin a chah a. Social Media hmansualna a tam hle nia a hriat thu pawh sawiin, a bik takin tawngkam mawilo leh thuziak dik tawklo a hluar hle a, Accredited Journalist-te chu hemi kawnga fimkhur tura ngenin ‘Journalist Ethics’ vawng nung reng turin a sawm a. Chanchinbumite chu mipuite hnena chanchinthar thlentu leh mipui kaihruaitu pawimawh tak an nih thu sawiin, an mawhphurna te hlen a, mipui hnena chanchin dik tak leh belhchiandawl chauh puang darh thin turin a ngen a ni.

Nimin-a ‘Press Accreditation Card’ thar semna hun hi I&PR Director C. Lalnunkima chuan kaihruaiin MJA Gen. Hqrs. President C. Lalrambuatsaiha pawhin Press Accreditation Card semchhuah a nih theihna tura Minister leh I&PR Department-te hmalaknaah lawmthu a sawi a, he hunah hian Minister hian MJA Gen. Hqrs. Office Bearer leh Executive Member-te hnenah ‘Press Accreditation Card’ thar hi semin Aizawl District huamchhunga Accredited Journalist-te hnenah MJA President hian a sem ve bawk a ni.

Press Accreditation Card hi kum hnih (2) chhung nung tur a ni a. Mizoram District hrang hranga atanga Mizoram Sawrkar hnuaia Accreditation rawn dilte atangin State Press Accreditation Committee chuan uluk taka thlangchhuakin, a zavaiin Journalist 140 hnenah pek a ni a. Aizawl District bikah chuan Journalist 51 hnenah pek a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result