Dan lova khaw din te chungchang ngaihtuah a ni

Lunglei District chhung Tlabung Sub-Division huamchhunga dan lova khaw din (Unauthorized Villages) chungchanga hmalak dan tur chu nimin khan Lunglei-ah Addl. DC Donny Lalruatsanga hovin sawiho a ni.

Khawthlangtuipui Group YMA chuan May ni 3, 2023 khan Press Release chhuahin, an area huamchhunga Dan lova khaw din - Zohmun, Lare Veng, Letisury, Khojoysurychhuah, Bornasury, Chandobighat, Dursury, Saisen, Nakuksora, Gurusora, New Balukiasury, Balukiasury-chhuah leh Bandiasora a chengte chu June ni 14, 2023 hma ngeiin an Parent Village-ah let leh turin an hriattir a. Hemi chungchang hi nimin thutkhawm ah hian sawiho a ni a. Meeting kaihruaitu Addl. DC Donny Lalruatsanga chuan Dan lova khaw din chungchang chu sawrkarin a ngaih pawimawh takzet tih sawiin, kum 2019 khan Joint Inspection Team (JIT) din niin, Inspection chipchiar tak neih a ni a, COVID-19 hrileng avangin hmalakna tihtawp lailawk anih thu leh hemi kawnga hmalakna hi uluk leh fimkhur taka kalpui zel a ngaih thu a sawi a, mihring dikna chanvo (human rights) bawhchhe lo zawnga kalpui a tul thu a sawi bawk.

Thutkhawm a tel te chuan SDO (C) Tlabung kaihhruaina hnuaiah Official-te leh Khawthlangtuipui Group YMA hruaitu ten heng Unauthorized Village te hi July ni 15, 2023 ralhma ngeiin tlawhchhuak leh vekin, an dinhmun te zirchiang se an ti a. Department hrang hrangte chu Unauthorized Village-ah te hmasawnna hna leh Scheme te lo kalpui lo tura hriattir an ni bawk.