Chief Minister in MIZOFED Annual General Assembly vawi 25-na a hmanpui

Mizoram State Cooperative Marketing & Consumers' Federation Ltd. (MIZOFED) chuan nimin khan Annual General Assembly vawi 25-na hmangin Chief Minister Zoramthanga chuan a hmanpui a ni.

Aizawl-a Synod Conference Centre-a MIZOFED Annual General Assembly-ah hian Chief Minister Zoramthanga chuan MIZOFED din a nih dan sawiin, hmasawnna atana Cooperative Society din pawimawhna leh tulna hmathlir nei chungin a remchan dan ang anga bultan a nih thu a sawi a. Tunhnuah pawl chungtlung zawkah insiamin kalphung felfai zawk neia hlawkna tam zawkte tel theia an awm chho ta zel chu lawmawm a tih thu a sawi bawk. Chief Minister chuan Cooperative Movement chu ramin chak zawka hma a sawn theih nan a pawimawh thu sawiin, hmasawnna hna sawrkarin a ruahman leh a duan te chu a theihna chen chenah Privatize zel tha a tih thu a sawi bawk. Mizoram hmasawnna leh siamthat hna chu a ram neitu, a chhunga chengte kutah a innghah thu Chief Minister chuan sawi bawkin, hripui leng leh thildang dang avangin harsatna ramin tawk mah ila, kan tawn aia chhiatna nasa zawk lo tawng tawh ram ropui taka insiama intungding leh ta te hre rengin, hmasawna nasa zawk kan thlen thei a ni tih hria a, mahni zawn theuhah thahnemngai taka ram tan thawk turin kalkhawmte chu a sawm a ni.

MIZOFED Annual General Assembly hi an Chairman K. Rothangpuia chuan kaihruaiin Cooperative Societies Registrar Amol Srivastava pawhin he hun hi a hmanpui a. MIZOFED hi Cooperative Marketing leh Consumer Federation a nih angin sumdawnna hlawm thum lian deuh deuha kalpui niin Petrol Oil Lubricants (POL), Liquified Petroleum Gas (LPG) leh Essential and Consumer (E&C) te a ni a. POL hian Petrol, Diesel leh Kerosene Oil te huamin Mizoram hmun 9-ah Petrol Pump an nei mek a, Petrol Pump thar tur hi Kawnpui, Hrangchalkawn, Champhai leh Phunchawng-ah te buatsaih mek a ni a, heng atan te hian NCDC-ah Financial Assistance cheng nuai 210 dil niin anni pawhin an rawn sanction tawh a ni.

Eirawngbawlna Gas (LPG)-a sumdawnna hi an hmalakna lian tak pakhat niin Aizawl, Champhai, Kolasib, Serchhip, Mamit leh Siaha District-ah an kalpui mek a, Essential Commodities leh Consumer items chi hrang hrang ah Dealership nei bawkin Aizawl bakah Serchhip, Lunglei leh Champhai-ah dawr an nei a ni. Tunah hian MIZOFED hnuaiah hian thawktu mi 169 awm mekin an zinga 64 chu Regular Staff an ni a, kum 2021-2022 chhunga MIZOFED net profit chu Rs. 1,77,24,44.15 a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar