Central YMA Transit Camp mi za chuangin pan tawh

Manipur tualchhung buaina avanga sahimna zawnga Mizoram rawn pan te tana Central YMA in innghah lailawkna (Transit Camp) an buatsaih chu mi za chuangin pan tawhin heng mite hi khawpui chhunga Branch thenkhat ten an thleng darh ve leh a ni.

Mizoram-a tlawmngai pawl lian ber, YMA hian Manipur tualchhung buaina avanga sahimna zawnga Mizoram-a Zohnahthlak raltlan, thlenna tur neilo leh belh tur chuang hre miah lo te tan innghah lailawkna (Transit Camp) atan Aizawl Tuikhuahtlang-a Central YMA Hall chu buatsaihin helai hmun hi hriat theih chinah 131 in an pan tawh a, heta tang hian khawpui chhung Branch YMA thenkhat Vaivakawn, Chanmari, Electric Veng, Tuikhuahtlang, Kulikawn, Hlimen, Tlangnuam leh Thuampui ten heng mikhual te hi an lo thleng darh ve leh a. Transit Camp atanga India ram hmun dang danga kal darh leh engemaw zat an awm bawk a, tunah hian Transit Camp-ah hian mi 24 an la awm a ni.

Hetianga Transit Camp atanga raltlan lo mikhualtu Branch YMA te hnenah hian Central YMA chuan tanpuina pek nise an ti a, Branch YMA raltlan lo mikhual thei te hnenah Central YMA chuan lawmthu sawiin, Branch YMA dangte pawh an tlin ang tawk tawka raltlan lo mikhual thei zel turin a ngen bawk a ni. Central YMA chuan Manipur raltlan te nasa taka lo tuamhlawmtu Silchar Branch YMA te chu tanpuina pawisa fai cheng nuai khat pek nise an ti bawk.