MPCC in thu dik lo leh puhna diklo a tam niin sawi

Mizoram Pradesh Congress Committee (MPCC) chuan tunhnaia KS. Thanga banna lehkha ah thu diklo leh puhna dik lo (allegation) tam tak a awm nia sawiin, a tul dan angin defamation case pawh an la ngaihtuah ang tih an sawi.

Inrinni-a thuchhuah an siamah MPCC chuan June 9, 2023-a KS. Thanga banna lehkha ah khan thu diklo leh puhna dik lo (allegation) tam tak a awm nia saiwin, “Khang thu diklo leh puhna dik lo te kha kan President zahawm tak tihhminghliau tumna a nih bakah, mawi lo taka Congress party beihna a nih avangin a tul dan angin defamation case pawh kan la ngaihtuah ang,” an ti a ni.

Congress Party atanga a ban chungchangah KS. Thanga chuan a tih phak tawk leh a tihawm tawk a ti nia an hriat thu pawh tarlangin, “Congress party-ah dinhmun tha a chan lai pawhin Congress party mi mai ni lo, Mizoram mipuiin a mizia chiang taka kan hriat a ni a. Chuvangin, Parliamentary Secretary leh Minister dinhmun hiala hlang kaitu Congress party a chhuahsan tak beihlet nana a thuziakte pawh a mizia enin a tih awm tawkah Congress party chuan kan ngai a. He thil avang hian kan party mipuite tumah chiai lo turin kan ngen che u a ni,” an ti bawk.