Tlawng lui lian danna tura hmalakna kal mek enfiah

Tlawng lui lian avanga Bairabi South in harsatna an tawh thin sutkianna atana hmalakna kal mek chu Inrinni khan bialtu MLA leh Supply Minister K. Lalrinliana chuan a tlawh.

Tlawng tui lian avanga Bairabi South-in harsatna an tawh thin sutkian nana 'River Training Works at Tlawng River' hna thawh mek hi hmun 4-a then niin thawktu mi 4 an awm a. Minister K. Lalrinliana'n a tlawh lai hian khawtlang hruaitute chuan tuilian in kopang a lak hek zel venna tura hnathawh Then 1-na, Then 3-na leh Then 4-na chu tha tak a thawh a nih laiin Then 2-na erawh beisei angin hna kalpui a nih loh thu an lo thlen a. Hetianga hna a khaihlak reng chuan ruahtui tlak tam hunah harsatna lian zawk a thlen an hlauhthawn thu an sawi a. Er. R. Lalduhthlanga, Sr. EE, NH. Division-III chuan he hna hi October ni 17, 2023 chhung a zawh hman tur a ruahman a nih thu leh zaa 70 thawk zo tawh anga chhut a nih thu a sawi a ni.

Bairabi North leh South-a Inhmun nei lo te tana MLA-LADS hmanga Inhmun ruahman sakna kal mek pawh bialtu MLA hian tlawhin he sum hmang hian Bairabi South-a Inhmun 56, Bairabi South Lei bulah Inhmun 43 leh Bairabi North-ah Inhmun 56 ruahman a ni a. Bairabi GSA tana Football khelmual laih mek leh Zophai ramri hnaih a inkalpawhna tha a awm theih nana kawng thawmthat hnathawh pawh tlawhin, ramri venhim nan leh ram hauh nan Zophai hmun a hmasawnna hnathawh kalpui a pawimawh thu a sawi bawk.