Agriculture Deptt. hnuaia hmalakna CM in a hawng

Chief Minister Zoramthanga chuan niminpiah khan Sihphir leh Sihphir Venghlun huamchhunga Agriculture Department hmalakna a siam km 16.58 a thui Agriculture Link Road 8 bakah tuikhuah 39 a hawng.

Heng hmalakna thar hawnna puala inkhawm Rohrenga Hall, Sihphir-a neih ah Chief Minister Zoramthanga chuan kuthnathawktute tana hmasawnna hnathawh hrang hrang hawn theih a ni ta chu lawmawm a tih thu sawiin, Kuthnathawktute hmasawnna tura Agriculture Minister leh a thawhpuite hmalakna chu fakawm a tih thu a sawi a. Mizoram chu ram leilung tha, thlai engkim that duhna ram a nih thu sawiin, an thlai thar phurhchhuahna kawnga kuthnathawktute harsatna tawh chu sawrkarin a hriatpui thu leh awlsam zawka thlai thar an phurhchhuah theihna tur kawng siam chu sawrkarin a ngaipawimawh tih a sawi a, hma a la zel dawn tih a sawi bawk. Chief Minister chuan Covid Hripui, Vawk hri leng, ramri buai leh thenawm rambuai nghawng thil hrang hrang avangin sawrkarin harsatna tam tak a tawk tih pawh sawiin, chutihrualin, heng harsatna karah pawh mipui mamawh ei leh barah harsatna tawk lo a sawrkar a kal thei leh hmasawnna ruhrel din a ni zel chu lawmawm a tih thu a sawi bawk.

He hunah hian khual zahawm Agriculture Minister C. Lalrinsanga pawhin kuthnathawktute puala din hmasawnna ruhrel pawimawh tak tak te hawn theih a ni chu a lawmawm hle tih sawiin, a Department chan Agriculture leh Irrigation & Water Resources hnuaia hmalakna hrang hrang a tarlang a. Sihphir khuaah PMKSY ‘Har Khet Ko Pani’ Scheme hmangin tuizem mi 20 hnenah pek a nih te, RKVY hnuaiah Sihphir leh Tuirial-ah Solar Cold Storage din a nih tur thu te, PM KUSUM hnuaiah kuthnathawktu ten tui pump-na khawl an neih thuai tur thu te a tarlang a. Tuihna humhalhna kawnga hmalakna kal zelah Sihphir Dakla lui bakah Dialdawk lui te chu Brahmaputra Board hnuaiah zirchian a ni dawn sawiin, kuthnathawktu kalkhawmte chu Sihphir Neihbawi tlanga OP-12 Biofertilizer buatsaih chu hmang tangkai turin a fuih bawk.

He hunah hian Scheme hrang hrang Special Assistance to State for Capital Expenditure (SASCE), NABARD Rural Infrastructure Development Fund (RIDF) bakah Rashtriya Krishi Vikas Yojana - Remunerative Approaches for Agriculture and Allied Sectors Rejuvenation (RKVY-RAFTAAR) hnuaia Agriculture Link Road laih thar pathum km 7 a thui leh kawng awmsa 5 ah te PCC flooring km 9.58 a sei cheng nuai 547.98 senga siam chu hawn a ni a. Hei bakah hian Pradhan Mantri Krishi Sinchayee Yojana ( PMKSY) hnuaiah cheng nuai 36.20 senga siam tuikhuah 39 - Secondary Structure 1 leh Water Harvesting Structure 38 te chu hawn a ni bawk.

Comments

Popular News (Last 30 Days)

Vawiin-ah HSSLC Exam result