Wetland Interpretation Centre & Herbarium hawng

Environment, Forests & Climate Change Department changtu Minister TJ. Lalnuntluanga chuan nimin khan Saitual District-a Tam Dil-ah Tam Dil Wetland Interpretation Centre & Herbarium a hawng.

Tam Dil Wetland Interpretation Centre & Herbarium hi Tam Dil leh a chhevela ramngaw, thing leh mau, lui leh a chhunga cheng Sangha, nungcha leh Savate leh kan chhehvel boruak pawimawhna hrethiamlo te tana inzirtirna leh inhrilhhriatna hmun leh thing, hnim, thing rah leh par awmte hming hrang hrang chhinchiahna a ni a. Tam Dil Wetland Interpretation Centre & Herbarium hi Mizorama din hmasak ber leh awmchhun niin hetianga lama tuimi leh zirlaite tan tangkai hle tura ngaih a ni. Nimin-a hawn tak Tam Dil Interpretation Centre leh Herbarium hi building awmsa cheng nuai 10 senga zauh leh thawmthata cheibawl a ni a, riah theihna tur Room 2; Khum 2 awmna leh Khum 4 awmna siam tel a ni bawk.

EF&CCA Minister TJ. Lalnuntluanga hian nimin vek khan thingtiak chi hrang hrang tihpunna leh enkawlna, Central Nursery chu Tuirial-ah a hawng nghal bawk a. Pathian thilsiam duat taka enkawl chu Forest Department nen a inhmeh hle tih sawiin, “Kan hnam leh Sakhuana kan kalpui dan pawh Pathian thil reldan nen a inrem hle a ni,” a ti a, Pathian thilsiam humhalh chu mihringte mawhphurhna a nih thu a sawi bawk.