Union Minister in Sanchar Saathi portal tlangzarh

 Communications, Railways leh Electronics & IT changtu Union Minister Ashwini Vaishnaw chuan nimin khan New Delhi-a Rail Bhawan Conference Hall-ah ‘Sanchar Saathi portal’ a hawng.

Nimin-a hawn tak Sanchar Saathi portal www.sancharsaathi.gov.in hi mipuite mamawhna phuhruk turin sawrkar laipuia Department of Telecommunications-te siam a ni a, mobile hmangtu ten himna (security) tha zawk an neih theihna tura  ruahman a ni. Sanchar Saathi portal kaltlang hian mobile hmangtu ten anmahni hminga Mobile Connection register a ni em tih an hriat theih bakah, an mobile an tihbo palhin block emaw, chhui zui leh zawn chhuahna kawng ah te leh kawng tam takah mobile hmangtute a pui thei dawn a ni.

Sanchar Saathi portal-ah hian module hrang hrang CEIR, TAFCOP leh a dangte a awm a. CEIR module hi mobile device/phone ruk leh tihbo te chhui zui theihna a ni a, he module hmang vek hian mobile device/phone ruk leh tihbo te chu India ram chhunga telecom operator zawng zawngte service hman theih loh turin a block theih bawk a ni.

TAFCOP (Telecom Analytics for Fraud Management and Consumer Protection) module hmang hian mobile subscriber ten an number hman lai mek mobile connection chu anmahni hmingin a awm ngei em tih an en thei a, hei bakah hian an mobile connection mamawh tawh loh te an titawp (disconnect) thei dawn a ni.