MIMA in Central YMA hmalakna an thlawp

Mizoram-a dan lova hnamdang sumdawng te chungchanga Central YMA hmalakna chu Mizoram Merchant Association (MIMA) chuan an thlawp thu an sawi.

Nimin a thuchhuah an siamah MIMA General Hqrs. chuan Mizoram-ah dan lova hnamdang sumdawng an tam ta hle nia sawiin, heng sumdawng te hian Mizo min la dip ral thuai dawn nia an hriat thu leh an mang angin Economic assimilation hlat lo hle ah an inngaih thu an tarlang a. Hetiang a nih laia Central YMA in dan loa sumdawngte dapchhuaka an sumdawnna titawp tura hma an la chu Mizoram leh hnam hmangaihna tak tak a nih thu leh lawmawm an tih thu tarlangin, Central YMA-in Mizo hming hawha hnamdang sumdawngte leh Mizo, sumdawnna atana hnamdangte hnena an hming hawhtirtute chu April 10 atanga chhiara ni 30 chhung hun a pek chu a lo ral tak thu an sawi a. He an huntiam ral hnu pawha CYMA thu pawh zawm duh loa luhlul la chhuah tlattute chu an dem thu an sawi bakah Mizo, sumdawnna atana an hming hawhtirtute chu Hnam hralhtute an ni tih in hria a, hetiang sumdawnna hi ti tawh lo turin an ngen a. Central YMA hmalakna chu MIMA chuan an thlawp tlat thu leh a tul ang zela hma an lakna kawngah pawh an theih tawkin an thlawp zel dawn thu an sawi bawk a ni.