Thirsakawr-a India fanchhuah tumin Mizoram a tlawh

Mahni Thirsakawr (Bicycle) khalh a India ram fanchhuah tum mek tu Aasha Malviya-i chuan Mizoram rawn tlawhin Governor leh Chief Minister te a kawm.

Thirsakawr (bicycle)-a India State 28 tlawhchhuak tura State hrang hrang kal mek Aasha Malviya hian Zirtawpni khan Aizawl rawn thlengin Raj Bhavan-ah Governor Dr.Hari Babu Kambhampati a kawm a, Aasha Malviya chuan Cycle hmanga India ram fanchhuah a tum chhan ber chu 'Hmeichhiate himna leh dinhmun chawisan' a nih theih nan a mipuite hnena zirtina thlen a nih thu Governor hi a hrilh a. India rama hmeichhiate dinhmun ngaihsak a, an dinhmun chawisan a nih theih nana Aasha Malviya-in engkim mahni intum chawp a hma a lakna chu fakawm a tih thu Governor hian a lo hrilh thung a ni.

Aasha Malviya hian Inrinni khan Chief Minister Zoramthanga chu CM Bungalow-ah kawm bawkin Chief Minister chuan a huaisenna chu fakawm tiin, a kal zelna turah duhsakna a hlan a. Sports & Youth Services Minister Robert Romawia Royte chuan tukthuan a buatsaih sak a. DGP Devesh Chandra Srivastva pawh a hmu bawk a ni.

Aasha Malviya hi Madhya Pradesh a Nataram khua, Rajghar District ami niin, National Sportswoman a ni a. Himna kawnga India rama hmeichhiate dinhmun chiang zawka mipuiin an hriat theih nan leh khawtlang a hmeichhiate dinhmun chawikan mamawhna te zau zawka puanchhuahna tura he ‘Pan India Cycle Tour’ hi nei ta a nih thu a sawi a. November ni 1, 2022 khan a chenna khua chhuahsanin India State zawng zawng fanchhuahna hi bul a tan a. State 18 a tlawh tawh hnuiin Aizawl hi a lo thleng a ni. Tun dinhmunah km 16200 tlan tling tawhin August ni 15, 2023 hian Delhi-ah India a fanchhuahna kawng zawh hi a titawp ang.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man