Thenzawl-a khualzin te hipna atan ni 2 awh ‘Thenzawl Calling Festival’ neih tan a ni

Serchhip District chhung Thenzawl-a khualzinte hipna tura hmalakna chi khat atan ni 2 awh tur ‘Thenzawl Calling Festival’ chu nimin khan neih tan a ni a, nimin khan Self Help Group te tan Ei siam intihsiakna leh Rimawi Band Competition neiin Vawiin hian intihsiakna chi hrang hrang neih leh a ni ang.

Mizoram Tourism Department, Deputy Commissioner Office, Serchhip District leh Thenzawl SDO (C) te buatsaih ‘Thenzawl Calling Festival’ hi Thenzawl Golf Course & Resort-ah neih niin Serchhip District Bawrhsap Nazuk Kumar IAS chuan a hawnna hun hi khuallian niin a hmanpui a, he hun hmang tura kalkhawm zawngte chungah District Bawrhsap chuan lawmthu sawiin, chibai a buk a, Mizoram in Thenzawl ah khualzinte hipna tur hmun kan nei tha hle tih sawiin, chu hmunah ngei hetiang hun buatsaih a chu lawmawm a tih thu a sawi bawk a, “Mizoram sik leh sa leh ram awm dante hi khualzinte hip nan a tha em em vek mai a ni, a ti. Bawrhsap chuan khualzin mite tan Tourism App siam thar a nih thu sawiin, he App thar hi tangkai takin mitinin hmang thei se a duh thu pawh a sawi a, Tourism lama hmasawnna hian Entreprenuer & Skill Development lamah nasa takin hma min sawntir dawn avangin Skill Development lamah tan kan lak deuh deuh a tul dawn tih a sawi bawk.


Nimin-a he Festival hawnna inkhawm hi Tourism Department-a Tourist Officer C. Ramsangzuali chuan kaihruaiin Tourism Department-a Deputy Director Zonunthari chuan inlawmna thu a sawi a, Tourism Department Joint Director Lalthakimi Pachuau chuan lawmthu sawiin hun a hmang bawk a ni.

Thenzawl Calling Festival-ah hian nimin chawhnu dar 3:00 atang khan Serchhip BDO hnuaia Thenzawl khaw chhunga Self Help Group (SHG) ten ei siam intihsiakin bul an tan a. A hawnna inkhawm neih zawh a nih hnu hian Rimawi Band Competition neih zui nghal a ni. Vawiin (Inrinni) hian Thenzawl Calling Festival hi neih chhunzawm leh a ni anga, Golf Tournament, Cooking Competition leh Cultural Dance Competition te buatsaih a nih dawn bakah Handloom & Handicraft Exhibition neih a ni bawk ang.

Comments

Popular News (Last 30 Days)

Vawiin-ah HSSLC Exam result

LPG man bithliah thar