SW&TA Minister in Sethawn-a Jordan Centre a tlawh

Social Welfare & Tribal Affairs Department changtu Minister Er. Lalrinawma chuan nimin khan Sethawn-a Jordan Centre tlawhin thawktute leh enkawl mekte nen an inkawm.

Social Welfare & Tribal Affairs Minister Er. Lalrinawma chuan ruihtheih thil chu ram leh hnam hmelma hlauhawm tak a nih angin ruihhlo laka fihlim tura inenkawlna hmun, Jordan Centre kan neih chu tangkai tak a hman a tul thu a sawi a. Sim tak takna nun nei tur chuan mahni inhnehna nun leh mahni inthunun theihna nun neih a pawimawh thu sawiin, beiseina nen a Jordan Centre pantute beiseina tihhlawhtlin a nih theih nan thawktute chuan inpekna thuk tak nen an hna kalpui turin a fuih bawk a ni.

Sethawn-a Jordan Centre-ah hian September ni 7, 2022 atang khan ruihhlo avanga harsatna tawk te enkawlna kalpui tan niin tun thleng hian mi 402 enkawl an ni tawh a. Thla 2 chhung enkawlna kalpui thin niin thawktu, Honorary Workers 41 leh thawktu nghet 15 an awm mek a ni. Thawktute chuan Centre awmchilh tur Doctor an mamawh thu te, mamawh zual lamkhawmna tur lirthei leh Centre-a enkawl laite taksa insawizawina tur khelmual an mamawh thu te an lo thlen a ni. Nimin a helai hmun a tlawhna ah hian Minister hi SEDP Social Rehabilitation Board member leh mi pawimawh dang ten an tawiawm a ni.