RUSA hnuaia hnathawh June 2023-ah zo turin phut

Mizo Zirlai Pawl (MZP) chuan RUSA hnuaia Mizoram chhunga College hrang hranga hmasawnna hna thawh mekte chu June 2023 chhung ngeia zo hman vek turin hnathawktute a ngen.

MZP General Hqrs. hian nimin khan Extended OB Meeting neiin Mizoram chhunga RUSA hnuaia College hrang hranga hmasawnna hna thawh mekte dinhmun an thlirho a, hemi chungchangah hian Sawrkar thuneitute leh building sak hna thawktute an lo sawipui tawh thu sawiin, an harsatna hrang hrang leh College hrang hrang zirlaite atanga thudawn te ngaihtuah a nih hnuin, RUSA Fund hmanga College building sak mek, sak zawh hun tur pel tawhte chu June 2023 ralhma ngeia sak zawh vek nise an ti a ni. RTI hmanga zawhna sawrkarin a chhan danin, RUSA Fund hmanga hna thawh mekte hi March 2023-a zawh hman tura ruahman a nih thu leh heng hna te hi Skyridge Construction & Consultancy Services, Aizawl leh SR Tochhawng Traders, Aizawl ten an thawk tih MZP in thuchhuah an siamah an tarlang a. He thil hi MZP Assembly 2022, Darzo-a neihin a lo rel tawh, ‘RUSA kaltlanga College hrang hrang sak that/ thawmthat hi a hun taka zawh a nih theih nan hmalak ni rawh se’ tih an bawhzuina kal mek a nih thu an sawi bawk.