Serchhip by-pass road ah a zatve aia tam zo tawh

National Highway-54 laihzauh leh siamthat hna thawh mekah Serchhip khawpui helna tura kawng thar laih ah hna thawh tur zatve aia tam an zawh tawh thu hnathawktute chuan an sawi. Tarlan tawh angin NH. 54 laihzauh leh siamthat hna thawh mekah hian Serchhip Town chhung chu Chhiahtlang leh Serchhp Kikawn-ah by-pass road siamin khawpui lunlai hel a ni dawn a, he hna thawktute chuan Chhiahtlang by-pass road bikah hian hna awm zawng zawng atanga za zela 98 chu thawh zawh anih tawh thu leh KM 2.571-a thui tur he by-pass Road-ah hian a luhna leh chhuahna tur hmun tlem ah harsatna ala awm avangin hna an la thawh zawh loh thu an sawi a ni.

New Serchhip Kikawn leh Sailiamkawn inkar helna tur Serchhip by-pass road-ah hna thawh tur KM 11.829 atangin za zela 65 chu an zawh tawh thu hnathawktute chuan an sawi a, kawng hi laih tlang ni tawhin KM 6 vela thui chu blacktop a nih tawh thu an sawi a. Tunah hian Retaining Wall siam hna leeh Culvert siam hna te chu a zatve aia tam zawhfel tawh a nih thu leh nakum lamah hna zawh hman an tum thu an sawi bawk a ni.

NH. 54 in Serchhip khawpui a helna tur by-pass road hi cheng vbc. 153.1 senna tur niin, December ni 11, 2021 atang khan hna hi thawh tan a ni a, by-pass Road Kikawn peng atanga KM 10.7-ah hian Lei dawh a ni dawn a, he bypass road ah hian Lei hi pahnih dawh tur niin Lei sei zawk hi meter 151-a sei niin pakhat zawk hi meter 15-a sei a ni thung ang.