H/S Headmaster sawn tum duh lovin pungkhawm

Serchhip District chhunga Bungtlang khaw mi thenkhat leh zirlaite chu Govt. Bungtlang H/S Headmaster sawn tum duh lovin nimin zing khan Govt. Bungtlang H/S bul tual-ah an pungkhawm.
Bungtlang Joint Action Committee huaihawta punkhawm neih ah hian JAC hruaitute chuan Govt. Bungtlang H/S Headmaster V. Suresha sawn tura tih chu an lo dodal tawh thu sawiin, a aiawh tura an dah chuan Science leh Mathematics Subject a lak theih dawn loh avangin zirna kawngah an hnufual phah dawn nia an hriat thu an sawi a. Hemi kawnga hma la tur hian an khua (Bungtlang)-a tlawmngai pawl hrang hrang leh Political Party hrang hrangte chuan lungrual taka Joint Action Committee (JAC) dinin, zirna leh kawng danga an khua ti hmasawntu, an High School Headmaster sawn tumna awm leh chu a tawp thlenga dodal an tum thu leh a tul anga sawrkar hotute pawh an dawr zel dawn thu an sawi bawk a ni.

Govt. Bungtlang H/S Headmaster V. Suresha hi kum 2021 August thla khan kaisangin Cherhlun-ah sawn a lo ni tawh a, khawtlang in nasa taka an nawr avangin thla thum (3) hnuah sawrkar in a dah kir leh nia thudawn a ni.