Tunhnaia Serchhip District-a Vawk thi zingah Vawk hri vanga thi finfiah a awm lo
Serchhip-a District Veterinary Officer (DVO) Dr. R. Lalmakthanga hnen atanga LENKAWL in thu a dawn danin tunhnaiah Serchhip District chhung khaw thenkhat atangin Vawk thi an awm thu hi dawn niin a tam ber chu Serchhip khawpui chhunga mi a ni a, heng Vawk thi te hi Vawk hri, PRRS vanga thi nia rinhlelhna a awm avangin Aizawl lamah Sample hi thawn a ni a, hetah hian PRRS nia rinhlelh ala nih leh avangin Phai lamah enfiah turin Sample hi thawn leh a ni a, tun thlengin hri leng avanga thi finfiah erawh ala awm lo a, chutihrual chuan Vawk thi zinga a tam zawk te hi chu tunhnaia khaw lum lutuk vanga damlo leh natna nei, Heat Stress nia an hriat thu leh Vawk thi pawh hi a ziaawm chho zel nia an hriat thu a sawi a. Tunhnaiah Mizoram-ah Vawk hri leng hmuh leh ni mah se Serchhip District chu tun dinhmunah Vawk hri leng, ASF leh PRRS lakah ala him nia an hriat thu a sawi a. Vawk vulhtute tan chi-aina tur a awm loh thu sawiin, Vawk hri lo lut thei lakah erawh fimkhur a tul thu a sawi a ni.
Serchhip DVO chuan kum 2013 chho-ah PRRS a len tawh avang leh hemi hnu hian ASF te a rawn len leh avangin Vawk vulhtute chuan an ran enkawl dan leh ran in tihfai bakah damdawi hmanga ran In tihfai dan pawh an hre tawh viau nia an hriat thu sawiin, chutihrual chuan in hrilh thar ve reng erawh a pawimawh thu a sawi bawk.
Tarlan tawh angin tunhnaiah Champhai District hmun thenkhatah Vawk natna African Swine Fever (ASF) a len mek avang leh Serchhip khaw chhungah ran natna Porcine Reproductive & Respiratory Syndrome (PRRS) nia rinhlelh Vawk damlo a awm mek avangin Serchhip District chhungah ram dang (foreign countries) atanga Vawk, Vawksa leh Vawksa atanga siam eitur reng reng lakluh khap a nih bakah ASF hri lenna hmun (Champhai District) atangin Vawk, Vawksa leh Vawksa atanga siam eitur reng reng lakluh khap a lo ni tawh bawk a ni.
Comments
Post a Comment