MZU-a VC thar in Governor leh CM te a kawm

Mizoram University Vice Chancellor thar Prof. Dibakar Chandra Deka chuan nimin khan Mizorma Governor leh Chief Minister te a kawm.

MZU Vice Chancellor thar Prof. Dibakar Chandra Deka hian nimin khan Raj Bhavan-ah Governor Dr Hari Babu Kambhampati chu a kawm a, Governor Dr. Hari Babu Kambhampati chuan MZU Vice Chancellor thar chu Mizoram-ah lo lawmin a mawhphurhna pawimawh tak chu tha taka hlen thei turin duhsakna a hlan a ni. Prof. Dibakar Chandra Deka chuan Larsap hi a mimal chanchin, zirna lam leh zirtirna huanga a tawn leh hriat te hrilhin, Mizoram University, India ram University zinga la naupang fal tak leh thang duang takah hotulu ber mawhphurhna a chang tur chu phurawm a tih thu a sawi a. Tun dinhmuna MZU hlawhtlinna chu tuna thawk mek te leh hotu hmasa te thawhrimna leh inpekna a nih thu sawiin, MZU in hma a sawn lehzualna tura thil pawimawh leh hmalakna kalpui hmasak tura a pawimawh deuh nia a hriat te Governor chu a sawi pui bawk.

Hemi hnu hian Chief Minister Zoramthanga pawh Chief Minister Office-ah kawmin Chief Minister chuan hmasawnna tura hmalakna hrang hrang a neih zingah mi thiamte nen a thawhho te, an thurawn mamawh changte a awm thu hrilhin VC hnenah chuan thawhhona tha tak neih zel a beisei thu a sawi a ni.

Prof. Dibakar Chandra Deka hian tun thla ni 1 khan Mizoram University Vice Chancellor hna hi chelh tanin amah hi Gauhati University-a M.Sc zir zo, IIT Kharagpur atanga M.Tech zirchhuak leh Tokyo Institute of Technology, Japan ah Post-Doctoral Diploma (DTTT) zo niin hemi hnu hian Gauhati University atangin D.Sc in Chemistry a zo leh a. Department of Chemistry, Gauhati University-ah Professor Senior ber niin kum 2011-2014 chhung khan Head of Department a ni a. Chemistry Field-ah a hnathawh that avangin Royal Society of Chemistry, London chuan kum 2016 khan FRSC chawimawina a hlan a ni. American Biographical Institute, USA-a Research Board of Advisors ah Member ni bawkin January 2017 to December 2019 chhung khan All India Association of Chemistry Teachers ah President a ni bawk.