PM in ‘Mann Ki Baat’ vawi 100-na hmangin Governor hovin hemi pual hian hun lo hman a ni

Prime Minister Narendra Modi chuan mipuite hnena Radio leh Media dang kaltlanga thu a sawi thin, Maan Ki Baat chu a tum 100-na atan nimin khan a sawi leh a. Prime Minister thusawi hi Mizoram atang pawhin Governor Dr Hari Babu Kambhampati hovin Raj Bhavan-ah ngaithlain hemi pual hian hun hman a ni.

‘Mann Ki Baat’ tum 100-na ah hian Prime Minister Narendra Modi chuan He Programme hian mipuite nen inzawmna tha tak a siam sak tih sawiin, “Thla tin ram mipuite hnen atanga thuchah sang tam tak ka chhiar thin a, thla tin ram mite hmel mak tak pakhat tal ka hmu thin. Ram mipuite simna leh inpekna nasa tak chu ka hmu a, ka hre bawk. Ka tan chuan ‘Mann Ki Baat’ hi programme a ni lo a, ka rinna, tawngtaina, Chaw ngheia dilna a ni,” a ti a. ‘Mann Ki Baat’ Programme hi All India Radio-a a thawhpui te chuan tawng chi hrang hrangin hun reilote chhungin rang takin an letling thin tih sawiin, an chungah a lawm thu leh Doordarshan leh MyGov. a a thawhpui te chungah leh Ram puma TV channel zawng zawng, Electronic Media chungah lawmthu a sawi bawk a. ‘Mann Ki Baat’ hlawhtlinna hrang hrangte a tarlang nghal bawk.

Prime Minister in Radio leh Media dang kaltlanga thu a sawi thin, Maan Ki Baat vawi 100-na pual hian Prasar Bharati (DDK) chuan Ministry of Information & Broadcasting ruahmanna a rawn duan angin Raj Bhavan-ah Program buatsaih niin Governor Dr. Hari Babu Kambhampati chuan khuallian niin a hmanpui a. Prime Minister thusawi ngaihthlak a nih hnuin Governor chuan Maan Ki Baat Program a Mizoram chungchang a sawina leh hmalakna tha deuh a tarlan kaihnawiha hmalatu pahnih Mizoram Lok Sabha MP hlui CL. Ruala leh Chite lui humhalh tura hma la tu Save Chite Lui Coordination Committee te chawimawina a hlan a. Maan Ki Baat chu Prime Minister thu sawi a ni mai lo tih sawiin, Prime Minister in he thusawi kaltlanga mipui nawlpuite nena inlaichinna thuk tak a siamna a nih thu a sawi a. Maan Ki Baat vawi 100 tihchhuah a nih chhung hian mi tam takin India ram hmasawnna atan Prime Minister hmathlir te tawmpuiin an theihna zawnah hma an la a. MKB vang hian mi hlawhtling tak tak – midang te eizawnna siamtu, Environment siamthatna atana midangte hmahruaitu leh hmasawnna kawnga bul tana, hlawhtling chho mek tam tak an lo chhuak tawh tih a sawi a. “MKB chu India ram chhung kaihhnawih chauh sawina a ni lova, heta tang hian khawvel ram hrang hrang te thawhhona leh issue pawimawh zual te sawi a ni thin,” a ti bawk.

‘Mann Ki Baat’ hi Oct. 3, 2014 khan a vawi khatna atan All India Radio kaltlangin tihchhuah niin thla tin Pathianni hnuhnung berah tihchhuah a ni thin a. Nimin-a a vawi 100-na puala Raj Bhavan-a hun hman ah hian Governor chuan Mizoram atanga India rampum huapa chawi-mawna sang dawngtute leh mi pawimawh sawm bik te neiin Official te nen an telpui a ni.