Kan sawrkar leh anga, ram leh mipui tan hna kan thawk tak tak dawn - Health Minister

Health Minister Dr. R. Lalthangliana chuan hripui leng vangin kum hnih chhung hna thawk thei lo mahse thlantlin an nih leh chuan ram leh mipui tan hna an thawk tak tak dawn tih a sawi.

Health Minister hian Inrinni khan Vaphai Health Sub-Centre, Health & Welness-a hlankai tak chu a tlawh bakah Samthang, Khawbung Zawlbukah leh E. Lungdar te a tlawh bawk a, amah lo hmuaktute hmaah tun MNF sawrkarah hian Covid vangin kum hnih chuang engmah ti thei lova an awm thu sawiin, “Hna lak leh therhlo kan in tihsak thei lo a. Pathian leh mipui zarah MNF a sawrkar leh ngei ang a, Khuanu’n zah ngaiin hripui a leng tawh lo anga, ram leh mipui tan hna kan thawk tak tak dawn a ni,” a ti a ni.

Health Minister chuan Hripui leng chung pawhin Sawrkarin mipui hmakhua ngaia hmasawnna a theih ang anga a kalpui thu leh a rahchhuahte hmuh chhoh zel a ni chu lawmawm a tih thu sawiin, East Tuipui huamchhungah pawh hmasawnna hrang hrangte siam a nih thu leh Health infrastructure-te pawh tihchangtlun zel a nih thu a sawi a. Hmun dang-a la awm ngailo nau nei turte awm lailawkna, Birth Waiting Hall, Vaphai Health & Wellness Centre-a ruahman a ni chu fakawm a tih thu a sawi a. World Bank Fund cheng vbc. 280 hmangin Hospital cheithat leh thuamthat kawnga hmalak mek zel a nih thu a sawi a. Health Sub-Centre te Health & Wellness Centre-ah hlankai an nih thu sawiin, heng zinga 34 velah Ayush Doctor dah a ni a, adangah te BSc. Nursing dah an nih thu a sawi bawk a. Sub-Centre awmlohna khua 235-ah Health Clinic dah a ni a, hmanraw mamawhte dah vek tum a ni, a ti bawk.

Commerce & Industries Minister ni bawk Dr. R. Lalthangliana chuan Zokhawthar Land Custom Station tihchangtlun nan cheng nuai 1500 senga hmalak mek a nih thu pawh sawiin, tunhnaia India rama Border Trade lian tham kalpuina tur hmun 25 thlan chhuah zingah Zokhawthar leh Zorinpui te a tel chu lawmawm a tih thu leh Mizoram tana chhawr nahawm tak tur a nih thu a sawi a. Bangladesh nena insumdawntawnna tihchangtlun nan Tlabung Kawrpuichhuahah cheng vbc. 552.25 senga hmalak tum a nih thu a sawi a. Ramri insumdawntawnna tih changtlun nan Border Hut-te pawh Sawrkar laipui dawra hmalak chhunzawm zel a nih thu a sawi a. Zirna tihhmasawn kawnga Sawrkar hmalakna te tarlangin, sum leh pai dinhmunte thlir chungin zirna sang zawk leh changtlung zawk chhawpchhuah kawngah theihtawp chhuah zel tum a ni, a ti bawk a. Ngaihtuahna ngelnghet tak nei tur leh thuthang nazawng te finfiah hmasa lova awih mai lo turin kalkhawmte chu a chah bawk.

Comments

Popular News (Last 30 Days)

LPG man bithliah thar