Mizoram-a COVID-19 dinhmun thlirho niin NE-ah Mizoram in hri kai enkawllai a ngah ber

Nimin khan Health Minister Dr. R. Lalthangliana hovin COVID-19 chungchanga Mizoram dinhmun thlirho a ni a, tunhnaia Mizoram-a COVID-19 hri kai hmuhchhuah tharte chu hri kai lanchhuahna nei deuh vek an nih thu leh travel history nei awm lovin, tualchhunga hri kai nia hriat vek an nih thu tarlan a ni.

SAD Conference Hall-a Mizoram-a COVID-19 hripui dinhmun thlirhona hunah hian Health Minister Dr. R. Lalthangliana chuan hun engemaw chen COVID-19 hri kai thar kan neih tawh loh hnuah April thla atang khan an awm thar leh tih sawiin, tun dinhmunah phei chuan hmarchhak State 8 zinga Positive case nei tam ber kan nih thu leh hengte hi awareness kan neih that zara kan in test that vang te pawh niin a hriat tih a sawi a. Mipuite leh Official-te tan pawh chi-aina tur thil a la awm rih lo nia a lan thu sawiin, “Hetih rual hian kan hun tawng tawhte atangin kan fimkhur chuan kan inveng thei tih a hriat a, hripui laka invenna kan hriat tawhsa te, a bik takin hmai tuamna (mask) vuah uluk kha kan ngaih pawimawh thar leh chu a pawimawh dawn a ni,” a ti a. Engemaw lo thleng thut thei thilah kan talbuai loh nan phili si lova kan lo in ruahman lawk erawh a tul thu a sawi bawk.

He thutkhawmah hian COVID-19 chungchanga Mizoram dinhmun uluk taka sawiho a ni a, hmalam hun hriat lawk a nih loh avang leh thil lo thleng leh thei turah damlote enkawl dan tur leh a hmachhawn dan tur lo inruahman dan tur siam tha tih niin a buaipuitu turte an inruat nghal a, damdawi leh hripui dona hmanraw hrang hrang kan neih mek dinhmun zirchiana a tul anga ruahmanna siam nghal tha tih nih bawkin, puipunna hmunah Mask vuah tha tura mipuite inzirtir leh a tul tih sawi a ni bawk.

He thutkhawm ah hian tunhnaia Mizoram a COVID-19 hri kai hmuhchhuah tharte chu taksa-a hri kai lanchhuahna (symptom) nei deuh vek an nih thu leh travel history nei awm lovin, tualchhunga hri kai nia hriat vek an ni thung tih tarlan a ni a. Hri kai hmuhchhuah thar zingah naupang kum 15 hnuailam leh kum upa lam an tam hle bawk a ni. IDSP, H&FW report danin kumin April thla khan COVID-19 hri kai mi 82 (Aizawl 75, Kolasib 3, Serchhip 2 leh Khaw-zawl 2) hmuhchhuah an ni a, May ni 1 khan COVID-19 hri kai 34 (Aizawl 18, Kolasib 9 leh Serchhip 7) hmuhchhuah an ni bawk.

April thla-a COVID-19 hmuhchhuah te Genome Sequencing Result dawn tawhah Omicron variant chi 3 – XBB.1.16.1, XBB.1.16 leh XBB.1.9.1 hmuh a nih thu tarlan a ni a, heng zinga pahnih - XBB.1.16.1 leh XBB.1.16 te hi variant tharlam lehzual niin Omicron variant dangte aiin inkaichhawn a awlsam zawk a, naupang leh kum upa lamah a thawk bik tih sawi a ni a. Lower respiratory tract a thlen thlak theih avangin a danglam bik tih tarlan niin mipuite tan chi-aina tur erawh a awm lova, COVID Appropriate Behaviour tha taka zawm a pawi-mawh hle tih tarlan a ni.

Hei bakah hian COVID-19 vaccine chu sawrkar laipuiin a thlawnin min pe tawh dawn lo tih tarlan niin Mizoram sawrkarin kan mamawh angte a lei ve zel a ngai tawh dawn a, COVISHIELD chu siamchhuah ni tawh lovin COVAXIN leh COVOVAX vaccine hman a ni tawh thung a, RT-PCR Test Kit leh Covid hri kai Serious te enkawlna tur damdawi man to chite a tul anga lei turin NHM in ruahmanna an siamfel tih tarlan a ni bawk a. ZMC-ah CO-VID-19 hri kai damlote enkawlna tur ICU khum 5 leh ward pakhat (khum 10) la zuah a nih thu pawh tarlan a ni bawk.