MSSSB hnuaia Common Recruitment Examination kalpui tura an tihsual MSSSB in an pawm

Mizoram Subordinate Services Selection Board (MSSSB) hnuaia Common Recruitment Examination kalpui tur tih danglam awm chungchangah MSSSB Chairman C. Lalhuliana chuan an tihsual an pawm thu a sawi.

MSSSB hnuaia Common Recruitment Examination kalpui turah Land Revenue & Settlement Department-a Surveyor post 15 lak tur cancel a nih leh chungchang leh Social Welfare & Tribal Affairs Department hnuaia Circle Officer post 36 lak tur Co-Terminus Basis a nih tur thu chhuah a nih chungchangah Mizo Students’ Union (MSU) General Hqrs. hruaitute chuan nimin khan MSSSB Chairman C. Lalhuliana chu a Pisa-ah an hmu a. MSSSB Chairman chuan sawrkar atanga thu an hmuh angin Land Revenue & Settlement Department hnuaia Surveyor post 15 lak tur chu Department atanga Technical Paper an buatsaih loh avanga cancel leh a nih thu sawiin, Department atanga Technical Paper buatsaih a nih huna he Surveyor post 15 cancel hi lak leh a nih tur thu a sawi.

Social Welfare & Tribal Affairs hnuaia Circle Officer post 36 lak tur Co-Terminus Basis a nih leh tur thuchhuah an siam chungchangah MSSSB Chairman chuan Department atangin Co-Terminus Basis a nih tur thu chu hriattir an nih rualin, eng huna tawp tur nge a nih tih an dawn tel loh avangin Advertisement-a Co-Terminus Basis a nih tur thu an ziah lan loh chungchanga an tihsual an pawm thu a sawi bawk a ni.

MSSSB Chairman chuan tun Common Recruitment Examination tura Surveyor leh Circle Officer hna chauh dil tum emaw, Common Recruitment Examination zinga hna dang dil duh lo an awm a nih chuan Application Form thehluhna man an sen chu pekkir leh an inhuam thu MSU hruaitute hi a hrilh a. MSU chuan MSSSB hnuaia Common Recruitment Examination tura tihsual leh tih danglam a awm hi tha lo an ti hle tih sawiin, zirlai tam tak hna dil turte rilru sukthlek tibuai zawnga Department an fimkhur tawk lo leh an che fel tawk lo chu pawi an ti takzet tih aan sawi a. Tun hnu zela thleng nawn tawh lo turin Department te leh MSSSB te chu fimkhur leh zual turin an ngen bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man