Madhya Pradesh leh Mizoram Speaker te inkawm

Madhya Pradesh Legislative Assembly Speaker Girish Gautam leh a thawhpuite chuan zan khat riak turin nimin khan Aizawl an rawn thleng a, nimin vek khan Mizoram Assembly Speaker Lalrinliana Sailo nen Speaker Office-ah an inkawm.

Speaker pahnih inkawmna ah hian Lalrinliana Sailo chuan Girish Gautam leh a thawhpui ten Mizoram an rawn tlawh chu lawmawm a tih thu sawiin, Mizoram chu ram nuam leh ralmuang, vantlang nunphung khaihlak zawnga chetna awmlohna a ni, tiin Mizoram chanchin tlangpui a hrilh a. Girish Gautam pawhin India chu hnam ziarang leh tawng hrang tam tak awmna ni mahse mitinte chu India leilung fate vek an ni tih sawiin, Mizoram inthlan hrang hrangah vote thlaktu thahnem tak an awm thin chu entawntlak a tih thu a sawi a. Madhya Pradesh pawhin kumin kumtawpah Mizoram ruala inthlanpui an hmachhawn ve tur thu sawiin, tluang taka mipui ten roreltu an thlan theih nan duhsakna a hlan nghal bawk.

Madhya Pradesh Legislative Assembly Speaker Girish Gautam leh a thawhpuite hian hmarchhak State pali Tripura, Mizoram, Assam leh Manipur te an tlawh dawn a. Mizoram Legislative Assembly hnuaia Financial Committee hrang hrang - Public Accounts Committee (PAC), Estimates Committee leh Committee on Public Undertaking (COPU) te hnathawh dan bakah 'Paperless Assembly' E-Vidhan kalpui dan te an rawn zirchiang dawn a. MLA leh sawrkar mi pawimawh thahnem tak an rawn kal a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man