Kumin a Green Mizoram Day hman dan tur rel a ni

State Level Sub-Committee on Green Mizoram chu nimin khan an Chairman leh Environment, Forest & Climate Change Minister TJ. Lalnuntluanga hova thukhawmin kumin a ‘Green Mizoram Day’ hman dan tur an sawiho.

He thutkhawm Chief Wildlife Warden’s Conference Hall-a neih ah hian EF&CC Minister chuan ramngaw humhalh leh venhim a pawimawh thu sawiin, Green Mizoram Day hman thin chuan mipuiah rah tha a chhuah zel a beisei thu a sawi a. Mizoram thing leh mau, nungcha humhalh a tihchangtlun kawngah mi thahnemngai tak tak an pungchho zel nia a hriat thu sawiin, lawmawm a tih thu a sawi a. “Thing leh mau te hi mihring mamawh chi hrang hrang petu a nih avangin duat taka enkawl hi Forest Department kutah dah mai lovin mitin mawhphurna a ni tih hria a, theihtawp chhuah tlan a ngai a ni,” a ti.

Kumin hian Green Mizoram Day chu June 9, 2023-ah hman nise tiin ‘Thingphun ila, enkawl zui ang u' (Plant a tree and keep it save) tih chu thupui atan hman a ni anga, hemi ni a thing phunna hmun atan Sihphir (Sakwrhmuituai tlang) thlan niin Chief Minister hovin hun hman tur a ni anga. Green Mizoram Award chu pekchhuah tan tura rel ni bawkin, mimal leh pawl hnena pekchhuah tur a ruahman a ni bawk.

Kum kal tawh ah thingtiak phun thinte chu a tet deuh thin avangin duh angin a nung khawchhuak zo lo fo a, hei vang hian a liansa deuh phun tawh nise tiin an rel bawk a. Thingtiak phunte dam khawchhuah that nan he Ni puala thingtiak la zawng zawngin an thingphunte an enkawl zui ngei ang tih intiamkamna nena pekchhuah tum tawh a ni a, an thingphun nun zat report pawh thehlut leh tura beisei an ni tawh dawn a ni. 'Green Mizoram Day' hi kum 1999 atangin hman niin kumtin June ni 11-ah hman thin a ni a. Nikum Green Mizoram Day pual khan thingtiak 19,261 phun a nih bakah thingtiak 1,18,540 semchhuah a ni.