Kumin ah Dengue vei mi 143 hmuh an ni tawh

Kumin January thla atanga April inkar chhung khan Mizoram-ah Dengue vei mi 143 hmuhchhuah a ni a, Dengue vei hi Mizoram State chhungah mi 2292 hmuhchhuah ni tawhin mi 5 in an thihpui tawh tih Mizoram State Vector Borne Disease Control Program te chuan an sawi.

SVBDCP chhinchhiah danin, Mizoram-ah kum 2019 khan Dengue vei hmuh tan a ni a, chuta tang chuan niminpiah, April 30, 2023 thleng khan mi 8,395 endikah Dengue vei mi 2,292 hmuhchhuah an ni tawh a. Kumin 2023 bikah Dengue vei mi 143 hmuhchhuah ni tawhin heng zingah hian thihpui an awm lo a ni.

SVBDCP hotute sawi danin, nikum chhung khan Mizoram-a Dengue vei hmuh an nih atangin nikum kha Dengue vei hmuh tam ber kum a ni a, mi 1,868 zet Dengue vei hmuh niin mi 5 in an thihpui bawk a, kum dangah chuan Dengue kaihhnawih thi hi an awm lo a ni. Chhin-chhiahna atanga a lan danin kum 2019 chhungin Dengue vei 131 hmuhchhuah a ni a, kum 2020 leh 2021 chhungin 67 leh 83 hmuh an ni bawk a. Kum 2020 leh 2021 chhunga Dengue vei tlem nachhan hi COVID-19 hri leng vanga rei tak lockdown vang anih thu an sawi bawk.

Kumin chhunga Dengue hri kai a san chhoh zel avangin SVBDCP hotute chuan May 3 leh 4 hian Aizawl Municipal Corporation (AMC) Area chhunga Local Council hruaitute bakah pawl hrang hrang hotute Dengue dona a thawhho dan tur an sawipui dawn a ni. Mipui tana invenna kawng tha tak siam a nih loh chuan Dengue hri leng hian State chhung hriselna lamah harsatna lian tak a thlen thei a, hei vang hian mi tam zawk tan harsatna a thleng thei tih sawiin SVBDCP hotute chuan, mi tin te fimkhur turin a ngen a ni.