Kumin-ah COVID-19 hri kai mi 6 boral tawhin hri kai atanga chhutin 1.72 zetin an thihpui

Tunhnaia Mizoram-a COVID-19 hri kai hmuhchhuah an nih leh hnuah May thla chhungin COVID-19 vangin Mizoram-ah mi 6-in nunna an chan tawh a, kumina COVID-19 vanga nunna chante hi hri kai hmuhchhuah tam zawng atanga za zela chhutin a sang hle.

Health & Family Welfare Department hnuaia Integrated Disease Surveillance Programme (IDSP) hotute sawi danin nikum October ni 29 atanga thla ruk (6) zet Mizoram-ah COVID-19 vanga thi an awm tawh loh hnuah kumin May ni 1 khan mi pakhat a thi leh a, May ni 16-a Thingsulthliah-a naupang kum 7 mi thi kha chhinchhiah chinah COVID-19 avanga kumina thi hnuhnung ber a ni. Kumin kum bul January ni 1 atanga May ni 16 thleng khan Mizoram-ah COVID-19 hri kai hmuhchhuah 349 an awm tawh a, an zinga 269 enkawl dam ni leh tawhin mi 6 an thi tawh a. Kum 2020-a COVID-19 hri len tan atangin hri kai hmuhchhuah atanga nunna chan zat hi za zela 0.30 a ni a. Kumin bikah erawh hi chuan hri kai hmuhchhuah an awm tan April atanga tun thlenga thi zat hi hri kai zat atanga chhuta za zela 1.72 zet a ni a. Thite hi May thla chhunga thi vek an ni bawk. 

Darkar 24 chhung khan Sample 46 endik zinga mi 6 chuan COVID-19 hri an kai tih hmuh-chhuah a ni a. Heng mi te nen hian COVID-19 hri kai enkawl lai mi 84 an awm mek a ni.

IDSP hotute sawi dan chuan April thla chhunga COVID-19 hmuhchhuahte Genome Sequencing Result dawn tawhah Omicron Variant chi thum – XBB.1.16.1, XBB.1.16 leh XBB.1.9.1 hmuh a ni tawh a, heng zinga Variant pahnih - XBB.1.16.1 leh XBB.1.16 te hi Variant tharlam lehzual niin Omicron variant dangte aiin inkai-chhawn a awlsam zawk a, naupang leh kum upa lamah a thawk na bik tih sawi a ni a. Thawkna dawt hnuailam a thlen thlak theih avangin a danglam bik tih tarlan niin mipuite tan chi-aina tur erawh a awm lova, laka invenna tur atana tih leh tih loh turte tha taka zawm a pawimawh hle thu an sawi bawk a ni.