UK-ah Mizo thalai Nurse thawn tum a ni

Mizoram Youth Commission (MYC) Chairman Dr. Vanlaltanpuia chuan, “United Kingdom-a thawk turin Mizo thalai nurse a tam thei ang ber thawn kan tum a ni,” a ti.

MYC Chairman hi kumin May 6 atang 17 chhung khan UK-ah zinin hemi chungchang hi Inrinni khan Aizawl press Club-ah thuthar thehdarhtute hnenah a sawi a, Mizo thalai a tam thei ang berin hna an hmuh theih dan tur a buaipui tih sawiin, “UK-a thawk tur nurse thawn chhuak hnem ber, Swindon, London-a Aryavrat (Charcos India) Company dawrin English zirna changtlung neih dan tur bakah anmahni ngeiin Mizo thalaite zirtirna an pek theih dan tur ka sawipui a ni,” a ti a. Mizo thalaite chu an hnaah thiam mah se tawng lamah harsatna an neih thin avang leh sap rama hna thawk tur chuan Occupational English test paltlang a ngai tih sawiin, “Kan thalaite hian ziak lamah chuan harsatna nei lo mah se tawng thluk inang lo leh hriatna lam pawh a chak tawk loh thin avangin an tan Coaching Class din a, Online leh Offline hmanga sap ngeiin Class an lakna din tumin hma kan la mek a, hun rei vak loah kan peih theih kan beisei a ni,” a ti.

MYC Chairman chuan hun rei vaklo ah nurse a tam thei ang ber thawn an beisei tih sawiin, “Nurse an mamawhna hi a sang a, keini’n thawktu tur (work force) kan ngah a. An hlawh pawh a tha bawk a; chuvangin nasa taka um zui kan tum a ni,” a ti a. UK-a nurse-te chuan thla khatah nuai hnih vel an hlawh nia sawiin, MYC kaltlangin Mizo thalai nurse panga UK-ah an thawn tawh niin a sawi a. Zawhna chhangin Covid leng vanga India ram hmun hrang hrang atanga hnathawk lo haw mi 3,000 velte chu an hna ngai thawkin an kir leh deuh vek tawh niin a sawi bawk.

Comments

Post a Comment

Popular News (Last 30 Days)

Vawiin-ah HSLC result

Vawiin-ah HSSLC Exam result