Kum 10 chhungah Mizoram-a mitthi ah mipa tam

Mizoram-ah kum 2011 atanga kum 2021 inkara thi zawng zawng zinga zaa 63.42 chu mipa an ni a, hmeichhia thi zat chu zaa 36.58 an ni.

State Economics and Statistics Department Director B. Lalrinhlua sawi danin nau piang tam lamah Mipa leh hmeichhe inthlauhna hi tamlo mah se, thi zat inthlauhna chu sang tak a ni, a ti a, kum 2011 atanga kum 2021 inkarah Mizoram chhunga mi 70,545 an thi a, heng zinga 44,739 chu mipa an ni a, hmeichhia 25,806 thi an awm bawka, kum 11 chhunga mipa leh hmeichhe thi inthlauhna chu 18,933 lai a ni tih a sawi bawk. Kum 2015 thleng khan State chhunga nunna suattu tam ber chu natna inkaichhawn awlsam atangin a nih thu pawh Director chuan sawiin, kum 2016 atanga 2021 inkarah erawh ruihhlo chu thihna thlentu tam ber niin zuk leh hmuam avanga natna lo insiam te leh Thin tha lo avanga thihna thleng te chu langsar zual a ni tih a sawi a, kum 2020 chhunga COVID-19 hripui avanga nunna an chan tam ang thoin kum 2022-ah pawh ruihhlo avangin mi tam tak an thi tih a sawi bawk.

State Economic and Statistics Department record-a a lan danin kum 2019-2020 chhung khan Mizoram-ah nupa tuak khatin fa an hrin zat chawhrual chu 1.9 a ni a, hei hian ramchhunga mihring cheng zat an kiam loh nan mithiamte'n nau hrin zat tura an bituk a pha lo a, ram a him reng theih nan hmeichhiate'n kum 15-49 an nih chhungin fa pahnih aia tlem lo an hrin a ngai tih pawh Director chuan sawiin, Hmeichhe pakhatin fa pahnih 2 chin chunglam an hrin hian mihring cheng zat kiam chuang lovin a in humhim theih a, chumi hnuailam chu zàwi zâwia hnam ral hret hretna a ni, a ti a. Kum 20/30 hnuah chuan pitar/putar an tam ang a, thalai an tlem ang a, hna thawk tur an tlem dawn tih sawiin, kum 50 vel a vei chuan hnam a ral titih mai dawnin a rin theih, a ti bawk.

Comments

Popular News (Last 30 Days)

LPG man bithliah thar