MADC Golden Jubilee lawmna zawhfel a ni

Mara Autonomous District Council (MADC) in kum 1972 April ni 29-a Autonomous District Council a neih atanga kum 50 a tlinna, Golden Jubilee lawmna kumkhat chhung neih chu Inrinni khan Siaha-a MADC Complex-ah ropui taka khar a ni.

MADC Golden Jubilee kharna ah hian khuallian MADC-a CEM M. Laikaw chuan Autonomous Council chu phu em vang pawh nilovin chanchintha avangin Hnam tlemte chu Pathian in humhalhin, chawikan a duh avanga a pek a nih thu leh an lawm takzet tih a sawi a. “Pawi–Lakher (PL) Regional Council atanga a hrana Autonomous Council kan neih theihna tura hma lo latute, ram tana an hna bansan mi 16 te zahna ka hlan a, heng hna chante leh in leh lo neilote ram leh in lo ngaihtuah saktu Pu Nohla Nohro awm tawh lo mahse a nupui Pi Siachei Chhachhai chuan min la dampuia chawimawina kan hlan thei hi kan vannei hle a ni,” a ti a. Heng mite leh an hruaitu hmasa te hmalakna leh inpekna avangin April 29, 1972-ah Lakher District Council hran neiin kum 1988-ah a hming hi Mara Autonomous District Council tia thlak a nih thu a sawi bawk.

MADC CEM chuan Golden Jubilee chu a ram a chengte Tisa leh Thlarau-ah inpumkhatna leh in unauna tha zawk thlentu niin, ram leh hnam tan pawha hmasawnna leh thil tha zawk thlentu a nih ngei a beisei thu a sawi a. Golden Jubilee Souvenir a tlangzarh nghal bawk.

MADC Golden Jubilee lawmna kharna hunah hian Kohhran Zaipawl te leh Malzai bakah Hnam lam hmuhnawm tak tak te entir niin PL Regional hunlaia Autonomous hran phuta Sawrkar hnathawk bang mi 16 zinga la dam awmchhun A.Pawchi leh heng mite lo buaipuitu Nohla Nohro nupui, Sialei Chhachhai te hnenah chawimawina hlan an ni bawk.