Zokhawsang hmuna Assam Rifles Battalion Hqrs. Complex thar Home Minister in a hawng

Union Home Minister Amit Shah chuan Inrinni khan Zokhawsang hmuna Assam Rifles Battalion Headquarters Complex bakah Project dang 4 hawngin hmasawnna hna thawh tur Project 6 chu lungphum a phum bawk.

Mizoram tlawhtu Union Home Minister hi Lengpui Airport-ah Transport Minister TJ. Lalnuntluanga leh Official pawimawh ten lo dawngsawngin Helicopter hmangin Thuampui Helipad a pan nghal a, hetah hian Chief Minister leh Home Minister bakah Chief Secretary leh DGP ten an lo dawngsawng leh a, heta tang hian Lammual pan nghalin Mizoram chhunga Project hrang hrang 5 te chu a hawng a. Chung te chu cheng vbc. 163.237 senna Assam Rifles Batallion Headquarters, Zokhawsang te; cheng vbc. 10 senna Lianchhiari Run (A Multi-Facility Centre), Aizawl te; cheng vbc. 119.2 senna Integrated Command & Control Centre (ICCC), Aizawl te; cheng vbc. 2.74 senna Cooperative Warehouse, Bairabi leh cheng vbc. 19.88 senna Impounding Dam and Development of Recreation Centre, Keilungliah, Champhai te a ni a.

Heng bakah hian Project dang 6 te chu bultanna turin Union Home Minister hian lungphum a phum nghal a, chung te chu cheng vbc. 193 senna tur Laldenga Cultural Centre, AR Ground te; cheng vbc. 781.85 senga Zorinpui - Longmasu NH-502 laihna tur te; cheng vbc. 329.70 senga Aizawl Bypass (Package-I) NH-6 laihna tur te; cheng vbc. 720.72 senga Construction of Aizawl Bypass (Package-III) NH-6 laihna tur te; cheng vbc. 71 senga West Phaileng to Marpara Road siamthatna tur leh cheng vbc. 2.70 senga Warehouse/Commercial Centre, Aizawl sakna tur te a ni.

He hunah hian Union Home Minister Amit Shah chuan kum 10 kalta chhunga Mizoram in hmasawnna hrang hrang a neih te chu fakawm a tih thu sawiin, Hmarchhak State-te hmasawnna turin India sawrkarin nasa taka hma a lak mek thu a tarlang a, tun tuma hawn leh lungphum phum tak project hrang hrang te ngei pawh hian Mizoram tan hmasawnna lian tak a thlen dawn tih a sawi bawk. Chief Minister Zoramthanga pawhin Union Home Minister ngeiin Assam Rifles Headquarters thar a hawng chu a lawmawm takzet tih sawiin, Mizo mipuite tan ni chhinchhiah tlak tak a nih thu a sawi a. Laldenga Cultural Centre sak tur pawh mipuite tan thil lawmawm tak a nih thu leh mipui 10,000 an len theih dawn thu a tarlang bawk a ni.

Comments

Popular News (Last 30 Days)

Vawiin-ah HSSLC Exam result