Aizawl-a AR hmunpui Zokhawsang-ah sawn dawn

Union Home Minister Amit Shah chuan Home Ministry leh Mizoram Sawrkar-in inremna an ziah zulzuiin Aizawl khawpuia Assam Rifles hmunpui chu Zokhawsang-ah sawn a nih tur thu a sawi.

Zokhawsang hmuna Assam Rifles Battalion Headquarters Complex hawnna inkhawm Inrinni-a Aizawl Sipai Lammual-a neih ah Union Home Minister chuan Mizoram atangin Assam Rifles sawn tura ngenna engemaw zat a dawn thu a sawi a. Hmasawnna atana khawpui tihzauh nan Mizoram hmun pawimawh takah Assam Rifles hmunpui, Home Ministry leh Mizoram Sawrkar-in inremna an ziah zulzuiin Aizawl khawpuia Assam Rifles hmunpui chu Zokhawsang-ah sawn a nih tur thu a sawi a ni.

Home Minister chuan Mizoram chu State a nih atanga kum 36 kalta chhunga a thanlenna leh hmasawnna chu fakawm a tih thu sawiin, Mizoram chu State tenau zinga hmasawnna kawnga hma la chak tak a nih thu a sawi bawk a. Hun harsa tak atanga tun thlenga Mizoram zinkawng chungchang sawiin, ram ralmuang taka a inthlakthlengna chu democracy chakna tilangtu a ni, a ti a. Prime Minister Narendra Modi kaihhruaina hnuaiah hmarchhak State-te chu a bik takin inkalpawhna leh hmasawnna ruhrel lamah hmasawnna chak tak kawng zawh mek a nih thu a sawi bawk.

Hmarchhak State-ah hel pawl an la awm thu pawh Union Home Minister chuan sawiin, helho chu an ralthuamte dah a lo haw tur leh hmasawnna kawnga tel turin a ngen a. Hmarchhak State bikah kum 9 kalta khan hel leh hmasawnna tlakchhamna tam tak hmuh a ni a, mahse kum 2014 atanga PM Modi kaihhruaina avangin kawng hrang hrangin hma a sawn nasa hle a ni, a ti. Hei bakah hian Amit Shah chuan kum 2014 hnu lamah thalai 8,000 chuang zetin hel an bansan tawh thu pawh sawiin, kum 2020 khan Bru ho dinhmun tur chungchanga inremna ziah a nih avangin Tripura-ah Bru mi 37,000 vel an inbengbel tih a sawi bawk a. Kum 2019 khan Tripura hel pawl NLFT nen inremna thuthlung ziah a ni a, kum 2021 khan Assam-a Bodo nen, kum 2020-ah Assam-ah Karbi Anglong nen pawh remna thuthlung ziak tawh bawkin, hmarchhak bialah Armed Forces Special Powers Act puanna hmun pawh za zela 70-ah a tlem tawh tih a sawi a, helho chetna chu kum 2014 hnuah za zela 67 in a tlakhniam thu leh Venghimtu sipai thi zat pawh za zela 60-ah tlahniamin, nunau pawisawi lo thah zat pawh za zela 83-ah a tlahniam tih a sawi a. PM Modi kaihhruaina hnuaia sawrkar laipui chuan khawpui lian hrang hrangte chu kawngpui, thlawhna leh rel hmanga inkalpawhna kawngah hmasawnna atan hma a la mek tih a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar