Sawrkar Kumthar 2023-2024 ah Mizoram a eng chhit man tihsan a ni dawn lo

Kawlphetha hman man bithliahtu, Joint Electricity Regulatory Commission for Mizoram & Manipur chuan sawrkar kum thar, April 1 2023 atanga êng chhit man tur chuMarch 28 khan bithliah felin April 1, 2023 atanga hman turah tuna rate hman lai ang chu la tha tawkah ngaiin tihsan ni lo se a ti.

Power & Electricity Department-in kum 2023-24 chhung atan Aggregate Revenue Requirement (ARR) leh Tariff bithliah sak an dilna chungchang hi March 20, 2023 khan Mizoram State Advisory Committee meeting-ah sawiho a ni a. Mizoram State Advisory Committee chuan tariff sang taka tihsan loh theih se a duh a. Tariff tihsan dilna chungchangah hian March 22, 2023 khan Aijal Club-ah public hearing neih a ni a. Hetah hian mimal leh pawlho atanga rawtna leh sawiselna siam pali zinga lo tel pathumte leh P&E Department-in an chhanna te ngaihthlak a ni.

P&E Department hian kum 2023-24 chhunga power supply enkawl nana Revenue sum mamawh Aggregate Revenue Requirement (ARR) cheng vbc. 782.33 bituk sak turin Commission an dil a, hemi hmuchhuak tur hian tuna tariff hman lai hi 3.15%-a tihsan a, sum mamawh tlin phak lohna awm chu Mizoram sawrkarin subsidy cheng vbc. 157.90 emaw, Commission-in ARR a bituk sak atanga 20.50% emaw, heta a tlem zawk zawk hian a phuhruk sak dawn tih an sawi a. An dil ang chuan eng chhit man thar tur hi chawhrualin Unit khat man Rs. 8.08 vel tur a ni.

JERC hian P&E Department sum mamawhna te a zirchian hnuin ARR atan cheng vbc. 567.77 a bituk sak a, hei hi kawlphetha hralhna atanga hmuhchuah tur niin Commission chhut danin tuna tariff kan hmanlai hmangin leh Electric Vehicle (EV) Charging Station atana rate thar rawtna atangin kumthar 2023-24 hian cheng vbc. 406.85 leh kawlphetha hman bang ram pawna hralhna atangin cheng vbc. 62.62 an hmuh theih beisei a ni a, hei hi avaiin cheng vbc. 469.47 a ni. Hei hian cheng vbc. 98.30 (i.e, 567.77 – 469.47=98.30)-in ARR a phuhru zo lova, tariff tih san-a, tariff sanna atangin phuhruk tur a ni a, hei hi sawrkarin cheng vbc. 98.30 subsidy pe-in a phuhruk sak theih dawn avangin Tariff tihsan a tul lova, Tariff hman lai leh category thar (EV Charging Station) atana hman tur rate an rawt hi FY 2023-24 atan hmang turin thutlukna a siam ta a ni.

Kum thar FY2023-24 chhunga Mizo-rama-a consumer te kawlphetha hman tur hi 512.58 MU vel a ni dawn a. Tariff kan hman lai mek anga chhutin P&E Department-in kum thar hian consumer te hnena kawlphetha hralhna atangin Revenue cheng vbc. 406.85 vel a hmu thei ang a, a pumpuia chawhrualin kumthar 2023-24 chhunga Unit khat man tur chu Rs. 7.94 a ni. Kumin 2022-23 aia kumthar 2023-24 chhunga kawlphetha hman zat a tam dawn avangin Tariff hi tihsan ni lo mahsela, kum thara Revenue hmuh tur hi kumina hmuh tur beisei zat aiin cheng vbc. 11.20-in a tam a ni. 

P&E Department-in FY2023-24 chhunga Consumer te eng pek nan Unit khat zelah Rs.11.44 mamawh tura an insawi laiin Commission-in ARR a bituk sak atanga chhutin P&E Department chuan eng pek nan unit khat zelah Rs.9.86 an mamawh a. Sawrkar-in subsidy a pek dawn avangin tlawm zawkin mipui hnenah chawhrualin Unit khat Rs.7.94 vel zelin an pe thei dawn ta a ni. Sawrkar-in consumer te subsidy a pek sak tur hi a chawhrualin unit khat-ah Rs.1.92 vel zel ang a ni.

Kum 2023-24 hian Mizoram-ah consumer 3,01,555 awm tura chhut a ni a, Mizoram pawna Generating Station leh Tuirial HEP Generating Station atangin kawlphetha 750 MU vel lei a tul dawn a, heng atanga leina tur hi chawhrualin unit khat man Rs.4.48 vel zel a ni.