Serchhip District-a YMA Branch 28 hnenah Formosa Foundation India-in Oxygen Concentrator an hlan

Formosa Foundation India chuan Serchhip District chhunga YMA Branch 28 leh damdawi In pali (4)-ah Oxygen Concentrator an hlan a, heng Oxygen Concentrator te hi Home Minister leh Hrangturzo bialtu MLA Lalchamliana chuan nimin khan a dawng turte hnenah a hlan a ni.
Heng Oxygen Concentrator hlanna puala inkhawm Joint YMA Hall, Aizawl-a neih ah Home Minister Lalchamliana chuan Mizoram a NGO lian ber YMA hnenah Formosa Foundation in Oxygen Concentrator te tangkai taka hmang tura an hlan chu fakawm a tih thu a sawi a. YMA te chu khawtlang ti mawitu, mi harsa te tanpui thintu niin, Formosa Foundation hian YMA pawimawhna an hrechiang hle niin a sawi a. YMA Branch ten thliarbik neiloa a mamawh apiangte hnena tangkai taka hmantir turin duhsakna a hlan nghal bawk.


Home Minister chuan hetianga khawtlang leh mipui rawngbawlna kawnga thahnemngai taka Formosa Foundation te an penchhuak thin chu fakawm a tih thu pawh sawiin, Oxygen Concentrator te hi mipuite tana tangkai leh mamawh, natna khirh tak tak tuarte nun chhanhim theitu a nih thu a sawi a, man to tham tak te a nih avangin awlsam taka lei a harsat thu leh Serchhip District chhung khaw hrang hrang te leh hmundang ten a thlawna an dawng thei chu lawmawm a tih thu a sawi bawk a ni.

Oxygen Concentrator hlanna puala inkhawm hi Formosa Foundation India-a Coordinator Vanlalruata Ralte chuan kaihruaiin Formosa Foundation India-a Chairman Jonathan Lalremruata chuan Formosa Foundation chungchang khuhhawnna a nei a. YMA Branch hrang hrang 28 leh Biate CHC bakahNorth Vanlaiphai, East Lungdar leh Khawlailung PHC te hnenah Oxygen Concentrator hi Home Minister chuan a hlan a. Keitum Branch YMA President Rorelliana bakah Tuichangral South Group YMA Secretary R. Lalneihsanga ten lawmthu an sawi bawk a ni. Nimin-a Oxygen Concentrator dawngtu YMA Branch te hi Hrangturzo Assembly Constituency huamchhunga YMA Branch tin te an ni.

Nimin-a he hun hmanna ah hian Home Minister Lalchamliana chuan he huna kalkhawm YMA Branch hrang hrangte Library-a dah tur lehkhabu, C. Zahmuaka ziah 'Ka Hringnun Zin Kawng' chu a hlan nghal bawk a ni.

Comments

Popular News (Last 30 Days)

LPG man bithliah thar