Mipui hriselna enkawl kawnga theihtawp chhuah theuh turin Health Minister in thawktute a chah

Health Minister Dr. R. Lalthangliana chuan mitin chanvo chu Healthcare tha tak dawn a nih avangin helama thawk zawng zawngte chu mipui hriselna enkawl kawnga theihtawp chhuah theuh turin a ngen a. Mizoram atanga TB umbo a nih theihna tur atan he natna vei ni a inringhlelte chu inentir vat turin a chah bawk.

World Health Organisation (WHO) din tan April ni 7, 1948 hriatrengna atana April 7-a ‘World Health Day’ hman thin puala nimin a thuchah a sawi ah Health Minister Dr. R. Lalthangliana chuan Mizoram mipui khua leh veng tina awmte hrisel tak leh thlamuang taka an awm theihna atana faina leh tui in tur tihthianghlim kawnga hma la zel turin mipui a chah a. Mizoram-ah Health and Welness Center 388 hawn thar a nih tawh thu sawiin, thingtlang kilkhawr tawpah pawh Health and Wellness Center hi a awm kim thawkhat tawh thu leh heng ah te hian a thlawna inenkawlna bakah natna chi hrang hrang – nu leh naute hriselnate, natna inkaichhawn theih loh, Thisen sang, Zunthlum, Cancer chi hrang hrangte hmuhchhuah vata rang taka enkawl an nih theih nan National Health Mission kaltlangin sawrkarin hma a la mek zel a ni, a ti bawk.

Health Minister chuan Sawkar laipui in natna chi hrang hrang do leh tihrem kawnga a hmalakna pakhatah TB chu kum 2025 a umbo turin a puang ta tih sawiin, Mizoram atanga TB umbo a nih theihna tur atan he natna vei inringhlel te chu in entir vat tur leh tha taka damdawi ei turin TB veite a chah a. Covid a ni emaw, natna dangte pawh hma taka enkawl a nih theih nan mipuite chu mithiamte rawn vat tura ngenin, chu chu natna taidarh tur venna pawimawh a nih thu a sawi a. Mipui te’n Online hmanga Doctor an rawn theihna turin Teleconsultation pawh khaw tinah chhawp hnaih a ni tawh tih a sawi bawk.

Minister chuan Mizote hi ruihhlo leh zuk leh hmuam ti an tam avang leh chu chu hriselna khawih pawi thei em em a nih avangin thangthar lo la awm turte leh sikul naupangte nasa taka inzirtir thar turin mitin a sawm bawk.

Comments

Popular News (Last 30 Days)

LPG man bithliah thar