Serchhip District-a Elementary School-a a thlawna sem tur Zirlaibu pekchhuah tan a ni

Samagra Shiksha Serchhip District chuan kumin atan zirlai naupangte hnena sem tur Zirlaibu chu nimin khan zirna In hrang hrangah an thawnchhuak tan a, zirlaite hnenah semchhuah nghal a ni ang.

Samagra Shiksha Serchhip District-a thawktute chuan kumin atana Elementary School-a a thlawn sem tur zirlaibu te hi tun dinhmun ah la rawn thleng kim lo mah se a rawn thleng tawh ang ang te chu zirlai naupang ten zirna bul an tan theihna turin an enfel hnuah nimin zing atang khan an semchhuak tan tih an sawi a, tunah hian pawl 1 zirlaite tan zirlaibu sem tur bu 3 rawn thleng tawhin Class-II zirlaite tan pakhat, Class-IV zirlaite tan pathum, Class-V zirlaite tan pahnih, Class-VI zirlaite tan 2, Class-VII zirlaite tan pathum leh Class-VIII zirlaite tan bu thum rawn thlengin semchhuah a nih thu an sawi a, Class-III zirlaite dawn tur erawh a la rawn thlen loh thu leh zirlaibu dangte pawh a rawn thlen veleh semchhuah leh nghal tur a nih dawn thu sawiin, District hrang hrang zingah zirlaibu hi semchhuak hmasa ber nia an in hriat thu an sawi bawk.

Samagra Shiksha Serchhip District-a thawktute chuan heng Zirlaibu semchhuah te hi Govt. School, Adhoc Aided School leh Deficit School-a zirlaite dawn tur a ni tih sawiin, Primary School 66 leh Middle School 61-a zirlai ten an dawng dawn a, tun thlengin zirlaibu dawng thei tura inziaklut hi pawl 1-ah 705; pawl 2-ah 415; pawl 3-ah 446; pawl 4-ah 375; pawl 5-ah 661; pawl 6-ah 719; pawl 7-ah 692 leh pawl 8-ah 695 an awm tawh thu an sawi a ni. Heng bakah hian Serchip District chhungah hian Pre-School 13 a awm thu pawh sawiin, heng Pre-School a kal naupangte hnenah pawh hian zirlaibu hi a thlawna sem a nih dawn thu leh he erawh ala rawn thlen loh thu an sawi a, heng Pre-School hrang hrangah hian inziaklut 158 an awm thu an sawi bawk.

Kumin atana zirna In hrang hrang ten zirlai an neih zat pawh an dawn khawm mek thu Samagra Shiksha-a thawktute chuan sawiin, School thenkhat report la fel chiah lo te a awm chungin April thla chhung hian an dinhmun tlangpui tur chu hriat theih an beisei thu an sawi bawk.