Damlo tamna Sainik School zirlaite dinhmun enfiah a ni

Serchhip District chhung Chhingchhip khuaa Sainik School-a naupang zingah damlo an tam avangin nimin khan Serchhip atangin Health Department-a thawktute chuan Sainik School hi an tlawh.
Sainik School-a naupangte zingah tunhnaiah damlohna hrang hrang nei an tam tih Health Department in an dawn avangin tunkar Thawhlehni leh Nilaini khan Chhingchhip PHC a Medical Officer Dr. Andrew Lalramliana leh a thawhpuite chuan Sainik School hi tlawhin he School-a awm naupang 82 te chu Malaria, Dengue, Typhoid leh COVID-19 an kai leh kai loh enfiah sak an ni a, heng zingah hian Malaria, Dengue leh COVID-19 hri kai hmuh awm lovin Rannung seh (Scrub Typhus) vei mi 13 leh Typhoid vei mi 8 hmuh an ni a, midang te hi Tlang hrileng-a ngaih niin an nat dan a zirin en-kawlna pawh pek nghal an ni bawk.


Hetianga zirlai naupang zingah damlo an tam avang hian nimin khan Serchhip CMO Office atangin Senior Medical Officer (SMO) Dr. Lallawmkimi Chhakchhuak hovin Malaria Team, IDSP Team leh RBSK Team te chuan Sainik School hi tlawhin naupangte dinhmun hi enfiah leh a ni a. RBSK Team hian enkawlna dawng mek naupang 35 te chu ennawn lehin an zingah hian ngaihtuahawm an awm lova, damlo thar mi 10 te pawh en nghalin ngaihtuahawm awm lovin mi 3 te chu Chhingchhip PHC-ah enthlak rih tura chawlh tir an ni thung.

Nimin-a Health Department Team ten he School an tlawh rual hian Health Awareness neih nghal niin Hostel Room zawng zawngah DDT kap turin leh Hostel a awmte Thosilen chu damdawi hmanga chiah turin Sainik School Principal chuan ruahmanna a siam nghal a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man