Serchhip-ah Police ten Vaihlo leh a kaihhnawih chungchanga Dan awmsa zirhona an nei

Serchhip District-a Dan leh thupek kengkawhtu (Police) te tan nimin khan Serchhip SP Conference Hall-ah zuk leh hmuam khuahkhirhna Dan hrang hrang zirhona neih a ni.
National Tobacco Control Programme (NTCP) hnuaia he zirhona hi Serchhip SP Stephen Lalrinawma chuan hmanpuiin Police te leh Health Department in thawhhona tha tak an neih thu leh kumin a World Hearing Day puala hun an lo hman ho tawh thu sawiin, thawhhona tha tak an neih hi a hlawkna teltu chu District mipuite ni se a duh thu a sawi a. Mizote chu zuk leh hmuam ti nasa tak kan nih thu sawiin, Police zingah pawh zuk leh hmuam ti tam tak an awm avangin Dan thenkhat kenkawh kawngah pawh harsatna a awm phah thei nia a hriat thu a sawi a. Meizial zu tawh tan sim leh mai a harsat tawh thin avangin a la ti lo, kum naupang zawk ten an tih lohna tura anmahni venhimna kawngah hmalak a tul thu pawh sawiin, a bikin nu leh pa ten kan fate mit hmuha mei kan zuk loh a tul thu a sawi a. Khawchhak lam atanga Sikret rawn lut te chuan Dan an zawm famkim loh avangin Package Commodities Act hnuaiah man theih a nih thu te pawh a sawi bawk a ni.

Serchhip-a Senior Medical Officer (SMO) Dr. Lallawmkimi Chhakchhuak kaihhruai he hunah hian Serchhip CMO Dr. Lalzawmi chuan Training a tel te inlawmna thu sawiin, Serchhip Police ten hetiang hun tha tak an buatsaih chu lawmawm a tih thu a sawi a. India ram hi zuk leh hmuam siamchhuk nasa pawl a nih thu leh a hmangtu pawh an tam berna pawl a nih thu a sawi a, natna kan tawrh zinga a tam zawk te hi vaihlo leh a kaihhnawih kan hman avanga kan tawrh te a nih thu sawiin, Cancer vei tam lamah phei chuan rampumah a sang ber pawl kan nih thu a sawi a. Zuk leh hmuam ti thin tan natna hrang hrang kai a awlsam thu sawiin, kan taksa a natna awm te pawh zuk leh hmuam avang hian nasa zawka kan tawrh theih thu a sawi bawk.

Nimin-a he Training -ah hian Serchhip, Thenzawl leh Chhingchhip atangin Police Department a thawk te telin National Tobacco Control Programme (NTCP)-a District Consultant K. Hmingthansangi chuan zuk leh hmuam kaihhnawih leh ngawl veina a lo awm theih dan leh hetianga laka inthiarfihlim theih dan te a sawi a. NTCP-a State Consultant Lalremruata Rokhum chuan vaihlo leh a kaihhnawih Dan in a khapna hrang hrang leh hremna awm te sawiin, Food Safety and Standards Authority of India (FSSA) chungchanga a zirtir bawk.