District Level NCORD Committee thutkhawm ah Serchhip-ah ruihhlo a hluar thu tarlan a ni
Sawrkar laipui ruahmanna anga din District Level Narco Coordination Centre (NCORD) Committee thutkhawm Serchhip DC Meeting Hall-a neih hi Bawrhsap mawhphurhna la mektu Serchhip Addl. DC Lalmuansanga Ralte chuan kaihruaiin Serchhip District chhungah chak taka ruihhlo dona kawnga ke pen anih theih nan inrawnkhawmna neia awmze nei a hmalak dan tur tha zawk ngaihtuah chhuah a nih theih nan thutkhawm neih thin hi a pawimawh thu a sawi a. Ruihhlo dona ah nasa taka hma kan lak laiin tha kan thlah a nih chuan nasa taka a rawn hluar leh mai thin avangin thawhhona tha zawk nen theihtawp kan chhuah zel a pawimawh thu a sawi a ni.
.jpeg)
He hunah hian NCORD Committee-a Member Secretary leh Serchhip SP Stephen Lalrinawma chuan NCORD Meeting hi thla tin neih tura ruahman ni mah se tun tum hi a tum 6-na leh kumin January 27 hnu lama thutkhawm neih leh hmasak ber a nih thu a sawi a. Thutkhawm hnuhnung ber leh tun tum thutkhawm inkarah Police ten ND&PS Act hnuaiah thubuai ziahluh an neih loh thu leh Excise & Narcotics Department in Heroin No. 4 gram 1191.2 manin thubuai 12 an ziahluh thu te, mi 20 an man bakah lirthei 3 an man thu a sawi a. Excise & Narcotics Department in Heroin an man te Aizawl lama an thawnthlak tul thin chu District-ah Drug Disposal Committee ten an tihral ve theih tawh thu leh Forensic Science Laboratory-a enfiah a nih chuan tihral theih a nih tawh dawn thu a sawi a. Ruihhlo chungchangah ruihhlo a hluar zel avangin kan dinhmun a that loh thu leh thawhhona tha zawk nen awmze nei zawka do tlan a nih theih nen Meeting neih thin a pawimawh thu a sawi bawk.
He hunah hian Excise & Narcotics Department atangin SI Benjamin Lalengmawia chuan kumin January 27 hnu lama an hmalakna te tarlangin, Heroin No. 4 tum 12 an man ah thubuai 12 ziahluh niin mipa 12 leh hmeichhia 8, an vaiin mi 20 an man thu a sawi a. Mihring an man zingah hian ramdang mi nia insawi mi 2 an awm thu leh pakhat hi raltlan nia insawi a nih thu a sawi a. Ruihhlo kaihhnawiha an man tam ber te hi Serchhip an nih thu leh mipui ten kan rin loh deuh deuh te pawh inhnamhnawih an awm tawh thu a sawi a. YMA te nen thawhhona tha tak an neih thu pawh sawiin, ruihhlo kaihhnawih thubuai liantham Serchhip-a khawih theih ala ni lo chuan harsatna a siam thin thu te a sawi bawk.
Serchhip Sub-Hqrs. YMA President Kawlthuama pawhin ruihhlo dona chungchanga YMA te hmalakna tarlangin, ramdang mi (foreigner) ten ruihhlo an ti punlun nia an hriat thu a sawi a. Raltlan nia insawi ten an duh hun huna ramri an kan chuan ruihhlo tawlh thin te tan remchang a siam nia an hriat thu sawiin, Ser-chhip aiin Thenzawl lamah ruihhlo a hluar nia an hriat thu leh YMA te pawh theihtawp chhuah tura an infuih ve reng thu a sawi bawk.
District Level Narco Coordination Centre (NCORD) Committee hi ruihhlo dona kawnga kawng hrang hranga hmalaa thawkho tura beisei niin an hnathawh tur pawh fel taka ruahman sak an ni a, nimin-a thutkhawm ah hian ruihhlo dona kawnga thawktu Sawrkar Department aiawhte bakah Assam Rifles leh BSF aiawhte pawh telin ruihhlo dona kawnga thawhhona tha zawk neih zel dan turte leh ruihhlo dona kawnga theihtawp chhuah zel a pawi-mawh thu te sawilan a ni.
Comments
Post a Comment