SEDP dawng tur list thehluh hun pawhsei sak

Chakma Autonomous District Council (CADC)-ah inthlanna neih a nih dawn avangin an huamchhunga Family Oriented SEDP Phase 2 dawng turte list thehluh hun tur chu thla khat atan pawhsei a ni.

Nimin khan Lawngtlai-ah District Level Socio-Economic Development Policy (SEDP) Committee chu thukhawmin Family Oriented SEDP Phase 2 kalpui dan tur chungchang hi an sawiho a, Village Level SEDP Committee te'n District Level Committee-a Phase 2 beneficiary list an thehluh theih hun tawp bera ruahman chu April 30, 2023 a nih laiin, CADC area bik tan CADC inthlan a awm dawn avangin hunbi tiam chu thla khat zela pawhsei sak nise an ti a. Phase 2 tanpuina sum hi August ni 30 ralhmain 2nd instalment nen pe tlak hman vek tura ruahman a ni.

Family Oriented SEDP Phase 1-ah khan Lawngtlai District chhungah department hrang hrang pariat hnuaiah beneficiary 4,500 an awm a. Heng department hrang hrang hnuaia Trade hrang hranga beneficiary-te hnenah hian SEDP tanpuina 1st instalment Rs. 25,000/- chu pek fel vek tawh a ni a; 2nd instalment Rs. 25,000/- pawh pekchhuah leh mek niin, beneficiary tam zawkin an dawng leh tawh a ni.