Mizoram in ram hauh chin ziakin thehlut tawh

State pahnih ramri buai chingfel tura Mizoram leh Assam Minister-te inbiak chhunzawm leh hun tur chu hriat la ni lo mah se Mizoram in an ram hauh chin ziakin an thehlut tawh.

Home Secretary H. Lalengmawia sawi danin nikum November ni 17-a ramri chungchanga Guwahati a inbiak kha inbiak hnuhnung ber niin khami tuma an thu dah pakhat chu Mizoram lamin thla thum (3) chhungin an ram chin ramri a khaw awmzat, a awmna hmun, eng Hnam te nge cheng tih leh thil dangte lakhawmin an thehlut ang tih a ni a. Hei hi State pahnih aiawh telna Regional Committee chuan a enfiah anga, a tulna apiangah Assam lamin a tanpui ang tih niin hemi chungchang ah hian Mizoram sawrkar chuan a ram hauh chin hi Assam sawrkar hnenah a thehlut tawh a, inbiakna buatsaih leh hunah sawiho a a tul dan azirin a hmuna enfiah tura thu dah a ni.

Home Secretary chuan Mizoram sawrkarin a ram hauh chin leh a behbawm chungchang a thehluh hi Assam sawrkar atangin chhanna an la hmuh loh thu leh inbiak lehna tur hun leh hmun chu Assam lamin ruahmanna an la rawn siam tura an ngaih thu sawiin, an hnen atanga thu leh hla engmah an la dawn loh thu a sawi bawk.

Home Minister Lalchamliana kaihhruai Mizoram palaite leh Assam Border Protection and Development Minister, Atul Bora kaihhruai Assam palaite hi ramri buai chinfel tumin vawi thum an inbe tawh a. Aizawl-a vawi hnih an inbiak hnuah nikum November khan Guwahati-ah an inbe leh a ni.