Cooperative Society hruaitute Office chelh theih hun chhung bithliah awm paih turin nawr zel

Mizoram Cooperative Society Tangrual Pawl chuan Cooperative Society hruaitute Office chelh theih hun chhung bithliah awm chu Cooperative Movement hmasawnna daltu nia ngaiin, Registrar Cooperative Societies (RCS) Mizoram hnenah paih tura an thlen tawh thu an sawi.

Niminpiah khan Apex Bank Board Meeting Room, Aizawl-ah Mizoram Cooperative Society Tangrual Pawl hian thutkhawm an nei a, Mizoram Cooperative Societies Act, 2006, Act-ah Co-operative Society hruaitu – Board of Management Committee ten an Office an chelh theih hun chhung (Term of Office) tarlan niin Act No. 53 hnuaia Proviso-ah hian Cooperative Society hruaitute chu a zawna kum 10 (sawm) bak hruaitu nihna chelh thei lo tura tih an niin, kum 5 chhung an chawlh hnuah chauh hruaitu nihna hi an chelh leh phal chauh a ni tih tarlan a ni a. Cooperative Society hruaitute office chelh theih hun chhung bithliah awm hi Mizoram Cooperative Society Tangrual Pawl chuan zirchianga an ngaihtuah hnuah, he Act hi Mizorama Cooperative Movement ti hmasawntu ni lo a, Cooperative Movement hmasawnna daltu ni zawka a ngaih avangin Act No. 53 hnuaia Proviso hi paih nise tih rawtna Registrar Cooperative Societies (RCS) Mizoram, Aizawl hnenah an thlen thu tarlan a ni.

RCS hian Act No. 53 hnuaia Proviso paih hi Federation ten an duh leh duh loh hriat a nih theih nan kum 2016 khan State Level Federation te chu an General Assembly theuha lo ngaihtuah turin a ti a. RCS hriattirna ang hian Mizoram chhunga State Level Federation te chuan hemi chungchang hi kum 2016 khan an General Assembly theuhah ngaihtuahin, Federation te chuan Act No. 53 hnuaia Proviso paih an duh thu an passed vek nia thudawn a ni bawk.

Cooperative Society hruaitute Office chelh theih hun chhung bithliahna paih a nihna tur hian Mizoram Cooperative Society Tangrual Pawl hruaitute chuan Department lam hotute vawi tam tak an hmuh tawh laiin an duhthusam ang hmalakna an hmuh loh avangin Chief Minister hnenah an thlen thu Meeting-ah hian sawilan a ni a. Chief Minister thurawn ang hian Mizoram-a Cooperative Society nung tha pangngai deuh leh State Level Cooperative Federation te chuan Cooperative Society hruaitute Office chelh theih hun chhung bithliahna dan an duh loh thu hi an Seal chhutna-a hming an sign hnan chu Chief Minister hnenah an thehluh tawh a. Mizoram chhunga Cooperative Society leh Federation te chu an sawrkar thutlukna lo ngaichang a, hruaitu lo inthlang rih lo turin an in ngen tih an sawi bawk.