Mizoram ah ‘Fentanyl’ a rawn luh hriat ala ni lo

Excise & Narcotics Department-a thawktute chuan Mizoram ah ‘Fentanyl’ a rawn luh an la hriat loh thu an sawi.

Tunhnaiah Mizoram-ah damdawi hmansual theih chi, chak leh hlauhawm tak 'fentanyl' rui an awm nia rinzawn theih tura Video a darh chiam leh Social Media thenkhat ah Mizoram-ah lo lut tawh anga sawi chungchang ah Excise & Narcotics Department-a thawktute chuan Fentanyl hi Mizoram-ah a lo la luh an hre lo tih sawiin, man pawh an la nei lo tih an sawi a. “Social Media-a darh vak, ruih nei nia lang, video-a mite kha No 4 ti thin kan hriatchian te an ni a. Heroin hi mihring azirin a thawh dan inanglo thei hle a, damdawi dang nen an pawlh phei chuan mak deuh deuhin an awm thei a ni,” an ti.

END-a thawktute chuan Mizoram-a ruih nana kan la hman tam ber chu Heroin No. 4 a nih thu leh khuh damdawi leh ganja a hluar leh bawk tih an sawi a. Mizoram-a ruihhlo ti zinga 80% chu mipa an nih avangin Mizo mipa an thi nasa a, a hnam ang pawhin vei thar leh tul an tih thu an sawi bawk.