AAP Mizoram in Zirlaite tanpui turin Chhatra Yuva Sangharsh Samiti an din

Aam Aadmi Party (AAP) Mizoram chuan zirlai harsatna tawk te tan hmalak zel an tum tih an sawi.

Inrinni khan Aizawl Press Club-ah thuthar thehdarhtute kawmin AAP Mizoram hruaitute chuan sawrkar School a that tawk loh avangin kan ramah Private sikul a tam phah em em thu leh chu chuan thingtlang leh khawpuiah nu leh pate tan harsatna nasa tak a thlen phah niin an sawi a, “Keini zirlaite hian zirlaite hamthatna hrang hrang Scholarship a hun tak a lak theih loh te, zirna In tha lo te, zirna hmanrua tha lo te, Zirtirtu indaih lo leh tha tawk lote kan tawrh phah a, heng kan harsatna hre reng chung sia sawrkarin hma an la duh tlat lote hi tha lo kan ti a. Chuvangin, zirlaite zirlaite tanpui turin AAP Mizoram chuan Chhatra Yuva Sangharsh Samiti (CYSS) chu March 16, 2023 khan a din,” an ti a. CYSS AAP Mizoram-ah hian Coordinator chu Vanlalthlamuanpuia a ni.

AAP Mizoram hruaitute chuan India khawpui ber, Delhi AAP sawrkarna ah chuan sawrkar sikul in nasa takin hma a sawn a, zirlaite pawhin Private sikul ai chuan sawrkar sikul a luh an thlang zawk hial tih an sawi a. “Heng AAP sawrkarna hnuaia hmasawnna nasa tak kan hmuhte hi keini zirlaite hian kan awt a, kan ramah pawh hian hetiang hi kan thlentir thei a ni,” an ti bawk.