April 18-ah LMC Councillor lakluh an ni dawn

Lunglei Municipal Council (LMC) inthlana Councillor thlan tharte lakluh hun atan Sawrkarin April ni 18, 2023 a ruat a, hemi ni hian Chairman leh Vice Chairman thlang nghalin, thutiam lak tir an nih dawn bakah Board of Councillors Meeting hmasaber neih nghal a ni bawk ang.

Mizoram sawrkar chuan Lunglei Municipal Council inthlan neih zawh taka Councillor atana thlanchhuah mi 11 te lakluhna hi Convention Centre, Lunglei-ah a buatsaih dawn a, Dan in a sawi angin, District Magistrate Ramdinliani’n Councillor lakluh inkhawm hi a kaihruai anga, Councillor atana thlan tlinte chuan District Magistrate kaihhruaina hnuaiah India danpui hnuaia rinawmna chhechham (Oath of allegiance to the constitution) hun an hmang anga. Chhia an chham zawhah hian Dan mit-ah Councillor puitling an ni chauh dawn a ni. Chhechham zawh hnuah Board of Councillors thutkhawm neih nghal a ni anga, hetah hian Chairman leh Vice Chairman thlangin, an thlanchhuahte chuan Oath of Secrecy thutiam an la leh ang.

Chairman leh Vice Chairman ten Oath of Secrecy thutiam an lak zawh hnuah Chairman thar chuan Executive Councillor atana a ruat te hming District Magistrate hnenah a hlan ang a, District Magistrate in heng Executive Councillorte hming list a chhiar chhuah hnuah anni hian Oath of Secrecy thutiam an la leh dawn a. He Board of Councillors Meeting hmasa ber atang hian Lunglei Municipal Council term hmasa ber pawh chhiar tan tur a ni dawn a ni.